येँया न्हूम्ह लाय्कू कुमारी ल्ययेगु परम्परागत पद्धति कथं आर्यतारा शाक्ययात ल्यःगु दु । इतुम्बहाः, भाष्करदेव संस्कारित केशचन्द्रकृत पारावर्त महाविहारया शाक्य कुलपुत्री खः।

वय्कः उगु विहारया अनन्त शाक्य व प्रतिष्ठा शाक्यया म्ह्याय् मय्जु खः। वय्कःया उमेर थौंकन्हय् निदँत्या स्वयां भचा अप्वः थ्यनाच्वंगु दु ।आः थ्वहे वइगु अष्टमि मंगलवाः कुन्हु न्हिनसिया १२ः०५ निसें १२ः१६ बजे तकया साइत दुने वय्कःयात कुमारी छेँय् छगू विशेष अनुष्ठान यासें न्हूम्ह कुमारीया आसनय् बिराजमान याकीगु ग्वसाः दु । नवमि कुन्हु हनुमानध्वाखाया तलेजुइ यंकाः विशेष पुजा जुइ।

दशमि कुन्हु वसपोलं मोहनिया सिन्हः तिकाबिज्याइ।थुगुसी न्हूम्ह कुमारी ल्ययेगु ज्याया भाला शाक्य महाविहार संघपाखें याःगु खः। संघया महासचिव संघरत्न शाक्यं जानकारी बियादीगु कथं कुमारी जुइगु लागिं आपालं निवेदन वःगु खःसां संघं दयेकातःगु मापदण्ड दुने लाःपिं स्वम्हेसित जक अन्तिम छनौटय् दुथ्याकूगु खः।

थ्व स्वम्ह मध्ये आर्यतारायात न्हूम्ह कुमारी ल्ययेगु ज्या जूगु खः। थुकी गुथि संस्थान, पञ्चाङ निर्णायक समितिं नं भूमिका म्हितूगु खःसा आः छनौट जूम्ह शाक्यपुत्रीयात राष्ट्रप्रमुखया थाय् नं यंकाः नापलाकीगु ग्वसाः दु।

Categorized in राष्ट्रिय