स्वनिगःलिसें यक्व थासय् तसकं वा वयाच्वन जल नापं मौसम विज्ञान विभाग, मौसम पूर्वानुमान महाशाखाया कथं थौं सुथंनिसें स्वनिगःलिसें यक्व थासय् वा वयाच्वंगु दु।

सुथंनिसें झन तसकं वा वःगु खः। मद्दिक वा वयाच्वंगु दु। आः लिपांगु छघौ दुने येँय् ६, यलय् ९.८ व ख्वपय् ५ मिलिमिटर वा वःगु खः। आः स्वनिगःया लिक्क लाःगु जिल्लालिसें तराई केन्द्रित वा वयाच्वंगु जल नापं मौसम विज्ञान विभागं जानकारी ब्यूगु खः। लिपांगु छघौ दुने पर्साय् १० व रौतहटमा १०.६ मिलिमिटर वा वःगु खः।

महोत्तरी व धनुषातक वा वयाच्वंगु धाःगु दु। लिपांगु १२ गू घौ दुने दकसिबे अप्वः कैलालीया गर्भाय् ८३.२ मिलिमिटर वा वःगु विभागया सुचं अधिकारी दिनकर कायस्थं जानकारी बियादिल। वय्कःया कथं १२ गू घौ दुने पर्साय् ४० व बाराय् २८ मिलिमिटर वा वःगु खः। जल नापं मौसम विज्ञान विभागं थौं व कन्हय् तसकं वा वइगु चेतावनी बिइ धुंकूगु खः।

चान्हय् अझ यक्व वा वइगु धाःगु खः।आः विशेष यानाः बागमती प्रदेश व मधेस प्रदेशया यक्व थासय्, गण्डकी प्रदेश व लुम्बिनी प्रदेशया छुं छुं थासय् नापं कोशी प्रदेशया छथाय् निथासं नँ न्याना वा वइ धका धाःगु दु।

वा वयेकीगु प्रणाली पूर्व–उत्तर पूर्व दिशापाखे न्ह्यानावनाच्वंगु व उगु थासय् वा वया हे च्वनीगुलिं सतर्कता नालेत व लिपांगु मौसमी सुचंया जानकारी कया च्वनेत इनाप याःगु खः।

Categorized in राष्ट्रिय