मोहनीया झिंछन्हुया दिं थौं पापाङकुश एकादशीकुन्हु मध्यपुरथिमिइ मल्लकालीन युद्धया लू क्यनीगु खाः पिहाँवइगु जात्रा क्वचाःगु दु।

उबलय्या राजदरबार कथं दूगु लाय्कुलिइ च्वंगु तलेजु भवानीया द्यःछें खड्ग, तरबार, ढाल, युद्धकवजलिसें मल्लकालीन युद्धय् छ्यलीगु साधन ज्वनाः युद्धकला प्रदर्शन यानाः उगु जात्रा क्वचायेकूगु खः।

दरबारलिसे सम्बन्धित बिस्कं समुदायतय्त ब्वति कायेकीगु खाः पिहाँवइगु जात्राय् गुठीयारतय्सं जामा फिनाः खड्ग, ढाल व तरबार ज्वनाः नगरया थी थी त्वालय् युद्ध यायेथें यानाः उबलय्या युद्धकला प्रदर्शन याःगु खः। लायकु दरबारं पिकाइगु थ्व जात्रायात थहनेया त्वाःया कथं इनाएत्वाः, निगू पुखू जुयाः दिगु भैरवतक व कोहनेया त्वाः कथं दथुत्वाः जुयाः बालकुमारीतक प्रदर्शन याःगु खः।

जात्राय् मोहनीया नवमी कुन्हु तलेजु भवानीयात ब्यूगु बलि व कोतदुने दूगु द्यः नापं दरबारया राजदण्डलिसें ज्वनाः नगर परिक्रमा याकूगु खः .। विशेष यानाः थ्व जात्राय् नायः पःमाः (उबलय्या दरबारया प्रशासक, श्रेष्ठ थरया), कर्माचार्य, जोशी, कुटु, प्याथः (प्रजापति), खड्गी समुदायतय् तप्यंक स्वापू दइ।

जात्राय् महानवमीया चान्हय् तलेजुइ बलि ब्यूगु खःम्यय्या छ्यं नं नगर परिक्रमा यानाः प्रदर्शन याइ । जात्राया झ्वलय् बालकुमारीइ भुयूफसि पालाः बलि बिइ। बलि ब्यूगु फसि प्रसादकथं नलधाःसा ल्वचं बचे जुइफइगु जनविश्वास दूगुलिं फसि काइपिनिगु भीड जुइ।जात्राया अन्तय् भुयूफसि पालीगु जूगुलिं थुकियात भुयूफसि पालेगु जात्रा नं धायेगु याःगु स्थानीय अर्जुन श्रेष्ठं जानकारी बियादिल।

जात्रा स्वयेत स्थानीयतलिसें थी थी थासं वःपिं म्वःम्वः दूगु खः।

Categorized in राष्ट्रिय