निर्वाचन आयोगं वइगु फागुन २१ गतेया निंतिं क्वःछ्यूगु प्रतिनिधिसभाया निर्वाचनसम्बन्धी सहलह यायेत थ्व हे असोज ३० गते राजनीतिक दलतय्त सःतूगु दु।

आयोगं विघटित प्रतिनिधिसभाय् प्रतिनिधित्व याइपिं लिसें वंगु निर्वाचनय् म्ह्वतिं नं छम्ह वडा दुजःतक त्याःपिं राजनीतिक दलतय्त लिक्क वयाच्वंगु निर्वाचनया तयारीबारे सहलहय् वयेत पौ छ्वःगु आयोगया आयुक्त डा जानकीकुमारी तुलाधरं जानकारी बियादिल।

आयोगं नेपाली कांग्रेस, नेपाल कम्युनिष्ट पार्टी (एमाले), नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टीलिसेंया दलतय्त नं पौ छ्वया धाःगु खः।

आयोगं थ्व हे असोज २० गते निर्वाचन ज्याधलः पितब्वःसां नं उगु आयोगया आन्तरिक ज्याया योजनाया निंतिं जूगुलिं निर्वाचन ज्याझ्वःलिसें विषयय् राजनीतिक दललिसे सहलहलिपा निर्णय यायेगु आयुक्त डा तुलाधरं कनादिल।

Categorized in राष्ट्रिय