टोखा नगरपालिकाया फुक्क त्वालय् नागरिक सुरक्षा समूह नीस्वनेत्यंगुु दु। नगरप्रमुख प्रकाश अधिकारीया संयोजकत्वय् बुधबाः च्वंगु नगरक्षेत्रया शान्तिसुरक्षा सम्बन्धी बैठकं थःगु त्वाः व त्वालय् सुरक्षा, सार्वजनिक सम्पत्तिया संरक्षणया निंतिं प्रहरीनाप समन्वय व मंकाः ज्याया निंतिं त्वालय् नागरिक सुरक्षा समूह नीस्वनेत वडा ज्याकुथिपाखें त्वालय् च्वपिन्त इनाप याःगु दु।

बैठकं टोखा दुने छेँखापतिकं छेँ थुवा नं थःगु छेँय् बालं च्वनाः च्वंपिनिगु म्हसिका सिइके फइगु भ्वं दुथ्याकेगु व बालं च्वनाः च्वंम्हेसिया छुं शङ्का जुल धाःसा सुरक्षा निकाययात सुचं बिइगु निर्णय नापं याःगु दु। अथे हे स्थिति सामान्य मजूतले मदयेकं मगाःगु ज्याय् बाहेकं बहनी ९ ताः ई लिपा छेँनं पिहां मवनेत, थःथःगु व्यापार व्यवसाय नं बहनी ९ ताः ई दुने बन्द यायेत नापं इनाप यायेगु निर्णय बैठकं याःगु दु।

टोखा दुने न्हापांनिसें दूगु प्रहरी ज्याकुथियात न्हापाया हे अवस्थाय् सञ्चालन यायेत नेपाल सरकारनाप इनाप यायेगु, नगरपालिका दुने छ्यलाबुलाय् वये मफयेधुंकूगु सतकया मत, सिसी क्यामेरालिसेंया सुरक्षा सम्बन्धी उपकरणयात भिंकाः याकनं छ्यलाबुलाय् हयेगु नापं बैठकय् निर्णय जूगु दु।

Categorized in राष्ट्रिय