नेपालभाषाया संकिपा ’इन्दिरा धिमे मैंचा’ शनिवाः छगू ज्याझ्वः दथुइ प्रिमियर जुगु दु । बिके फिल्म्सया निर्माण कथं तयार जूगु थ्व संकिपाया मुख्य निर्माता गोपालकृष्ण महर्जन नापं सुरेन्द्र शाक्य, गोपालकाजी कायस्थ व गोविन्द महर्जन खः।

नेपाःया दकले न्हापांम्ह धिमेवादक मिसा इन्दिरा लाछिमस्युया जीवनीइ आधारित थ्व संकिपाय् रोजिना सुवालं इन्दिरा जुया म्हितादीगु दु। थुके रुपेन्द्र श्रेष्ठ, नगिना जोशी, रामराजा भाम, देबचन्द्र बज्राचार्य, भोगेन्द्र मानन्धर, तुयु महर्जन, लक्ष्मीकुमार महर्जन, सुनिता श्रेष्ठ नापं ख्यालिजुजु मदनकृष्ण श्रेष्ठया विशेष भुमिका दुसाः मचाम्ह इन्दिराया रुपय् मचाबलेया पात्र सिम्रिक श्रेष्ठं म्हितादीगु दु।

मुकेश हुमागाइं व दिव्य सुबेदीया सिनेमाटोग्राफि अले सुजन बडालया सम्पादन, रोहिया महर्जन व राहुल बराइलीया कोरियोग्राफि यानादीगु थ्व संकिपायात प्रिमियर ज्याझ्वलय् सकसिगु नुगः त्याकुगु खँ निर्देशक व च्वमि सुरेन्द्र तुलाधरं कनादिल।

ख्वपया मेयर सुनिल प्रजापतिया ल्हातिं रिबन चाना प्रिमियर याःगु ज्याझ्वलय् मुख्य निर्माता गोपालकृष्ण महर्जनं लसकुस नुगःखँ तयादीगु खः।

Categorized in मनोरन्जन