अख्तियार दुरुपयोग अनुसन्धान आयोगया पुचलं चिकित्सा विज्ञान राष्ट्रिय प्रतिष्ठान, वीर अस्पतालया लेखा अधिकृत ढुण्डिराज दाहालयात छगू लख तका सिबें अप्वः घुस ध्यबा नापं नियन्त्रणय् काःगु दु।

लेखा अधिकृत दाहालं थीथी सप्लायर्स कम्पनी, ठेकेदारपिंत नियमकथं भुक्तानी यायेमाःगु बिल ध्यबाया निंतिं घुसया कथं काःगु छगू लख नीद्वः न्यासः व चयतका थःगु ज्याकुथिइ सुचुकातःगु धइगु सुचं लिसें उजुरी निवेदनया लिधंसाय् आयोगया पुचलं म्हिगः नियन्त्रणय् कायागु धकाः प्रवक्ता राजेन्द्रकुमार पौडेलं धयादिल।

वय्कलं धयादिल, “लेखा अधिकृत दाहालया ज्याकुथिं घुस कथं कयातःगु ध्यबा, मोबाइल छगः व मेमेगु भ्वँत नाप नियन्त्रणय् कयागु खः।”विषयय् थप अनुसन्धान जुयाच्वंगु धाःगु दु।

Categorized in अपराध