प्रधानमन्त्री सुशीला कार्की ने.सं. ११४६ कछलाथ्व पारु (कार्तिक ५ गते) येँ, यल, थिमिइ जुइगु स्वंगुलिं ज्याझ्वलय् मूपाहाँ कथं झायादीगु जूगु दु।थुकिया नितिं यल न्हूदँ समारोह समिति, शंखधर प्रतिष्ठान व नेपाल संवत न्हूदँ राष्ट्रिय समारोह समितिया दुजःपिन्सं नापलानाः प्रधानमन्त्री कार्कीयात मूपाहाँ जुयाः झायेत ब्वनापौ लःल्हाःगु खः।

 

म्हिगः सोमवाः नेपाल संवत न्हूदँ राष्ट्रिय समारोह समिति ११४६ या नायः प्रेमहिरा तुलाधरया नेतृत्वय् वंगु प्रतिनिधि मण्डलं प्रधानमन्त्री कार्कीयात नापलानाः बसन्तपुरय् जुइगु भिंतुना सभाय् मूपाहाँ कथं ब्वति कायेत ब्वनापौ लःल्हाःगु खः।प्रधानमन्त्री कार्कीं नेपाल संवतया न्हूदँया लसताय जुइगु स्वंगुलिं ज्याझ्वलय् ब्वति कायेगु जानकारी बियादीगु खः।

 

ध्यानाकर्षण पौ लःल्हानाः कासें प्रम कार्कीं नेपाल संवतयात कयाः यायेमाःगु ज्या छु छु खः थुकियात कयाः सहलह ब्याकेगु जानकारी बियादीगु खः।प्रधानमन्त्री कार्कीयात समारोह समितिपाखें नापलायेगु नितिं नेवाः न्ह्यलुवा मल्ल के सुन्दर, न्हूदँ संरक्षण समाजया कजि प्रा.डा. नरेशमान बज्राचार्य, समारोह समितिया सचिवालय दुजः सुजीव बज्राचार्यया ब्बति दुगु खः ।