स्थानीय प्रशासनपाखें अनुमति मकाःसे येँया माइतीघरय् प्रदर्शनया निंतिं वंपिं ५० म्हेसित थौं नेपाल प्रहरीं हिरासतय् काःगु दु।थौं सुथंनिसें माइतीघरय् प्रर्दशन यायेत वंपिं जनेजी युनाइटेडया दुजःतय्त जिल्ला प्रहरी परिसर, येँया टोलीं सोधपुछया निंतिं नियन्त्रणय् कागु दु।

स्थानीय प्रशासनया अनुमतिमदयेकं प्रदर्शन यायेत्यंगु व मेमेगु जेनजी पुचः दथुइ सम्भावित ल्वापुपाखें प्रदर्शनकारीतय् हे असुरक्षा जुइगु खनेदूगुलिं सोधपुछ यायेत नियन्त्रणय् काःगु प्रहरी परिसर, येँ पाखें धाःगु खः। नियन्त्रणय् काःपिं ५० म्ह मध्ये २४ म्ह मिसा व २६ म्ह मिजं दु।

जेनजी युनाइटेडया न्ह्यलुवा मदन कार्कीं थःपिंसं स्वतन्त्र रुपं प्रदर्शन यायेत जिल्ला प्रशासन ज्याकुथि, येँपाखें अनुमति कयाबलय् मब्यूगु धयादिल। वय्कलं प्रहरी प्रशासनं प्रदर्शनकारीतय्त नियन्त्रणय् कायेगु लोकतान्त्रिक मजूगु धयादिल। “झीपिं जेनजीत छधी जुइमाः धइगु सकारात्मक भाव ज्वनाः वनेनु धकाः जुयागु खः। तर जिमित याकेमबिल। जिल्ला प्रशासन ज्याकुथि येँपाखें अनुमति कायेमफुत, मबिल”, खनालं धयादिल।

Categorized in राष्ट्रिय