सुद्र्यःया श्रद्धा भक्ति भाव तयाः पुजा आराधना यानाः न्यायेकीगु छठपर्व थौं सुथय् लुयावया च्वंगु सुद्र्यःयात अर्घ बिइ धुंकाः क्वचाःगु दु। लुयावया च्वंगु सुद्र्यःयात खुसि पुखूसिथय् च्वनाः पुजा आराधनालिसें साया दुरु, स्वां व लखं अर्घ बिइधुंकाः छठ क्वचाइगु धार्मिक विधि दु । थथे घाटय् याइगु पुजायात भिन्सरघाट धाइ। सुथय् हे घाटय् याइगु पुजा जूगुलिं भिन्सरघाट धाःगु खः।

सुद्र्यः लुइगु इलय् अर्घ बियाः सुद्र्यःया दर्शन यायेधुंकाः छठ पुजा सिधइ। सुद्र्यःया दर्शन यायेत भक्तजनत वसः पुना ंहे जँय्तक लखय् दुनाः सुद्र्यःया दर्शन यायेगु विधि दु। पृथ्वीइ दुपिं सकल जीवया सञ्चालन व संरक्षण ल व सुद्र्यःपाखें जूगुलिं खुसियात मां, सुद्र्यःयात फुक्क कथंया शक्तिया स्रोतया कथं कयाः विशेष पुजा यायेगु धार्मिक विश्वास दु।

कात्तिक शुक्ल पक्षय् सुद्र्यःया पुजा यात धाःसा मनंनिसें तुनातःगु पूवनाः थःम्हेस्यां मनय् तःगु फल दइ धइगु धार्मिक विश्वासया चर्चा शास्त्रय् यानातःगु धर्मशास्त्रविद् प्रा तोयराज नेपालं धयादिल। सूर्यषष्ठी नापं धाइगु कात्तिक शुक्ल षष्ठीइ सुद्र्यःया पुजा आराधना यायेगु निर्देश शास्त्रय् यानातःगु वय्कलं धयादिल।

थुकिया लसताय् सुद्र्यः पुजा व दर्शन यानाः इहिपाः जुइधुकूम्ह मिसा, मिजनं थः त्यपुया तःआयु व इहिपाः मजूनिपिंसं भिंम्ह बाँलाःम्ह सर्व गुणं जाःम्ह भात, कला दयेमाः धकाः मनंतुनी। सन्तानया इच्छा तयाः थ्व पर्व न्यायेकीपिंनं तःल्याखय् दु। थ्व व्रतं मनंतुंगु पूवंकीगु यक्वःसिया विश्वास दु।

कात्तिक शुक्ल चतुर्थीनिसें सप्तमीतक न्यायेकीगु सुद्र्यःया आराधना, उपासना व पुजाया थ्व  पर्व थुगुसी वंगु शनिबाःनिसें न्ह्याःगु खः। चतुर्थीया दिं च्वख यानाः च्वनी। थुगु दिंनिसें छठ सिमधतक अपसं च्वनीम्हेस्यां ला, ख्यँय्, लाभा, दुसि, फापर, मुसुतकं मनसें च्वनेगु विधि दु। कात्तिक शुक्ल सप्तमीया दिं थौं सुथय् लुयावया च्वंगु सुद्र्यःयात अर्घ बिइधुंकाः थ्व पर्व क्वचाःगु खः।

Categorized in राष्ट्रिय