गृहमन्त्री ओमप्रकाश अर्याललिसे नेपाःया निंतिं अमेरिकाया राजदूत डिन आर थम्प्सनं नापलानादीगु दु। सिंहदरबारया मन्त्रालयय् थौं नाप लायेगु झ्वलय् वय्कःपिं दथुइ निगूपक्षीय सम्बन्धया विषयय् सहलह जूगु मन्त्रालयं धाःगु खः।

उगु झ्वलय् मन्त्री अर्यालं लिपांगु इलय् मुलुकया अवस्थाय् न्हियां न्हिथं सुधार जुया वयाच्वंगु न्ह्यथनादिल। थुकिया निंतिं दक्व पक्षलिसे सहकार्य जूगु नापं सर्वसाधारण व सुरक्षा संयन्त्र दथुइ विश्वासया वातावरण दयाच्वंगु वय्कःया धापू खः।राजदूत थम्प्सनं लिपांगु इलय् मुलुकय् ब्वलंगु परिस्थिति लिपा शान्ति कायम यायेत व सुरक्षा व्यवस्थापनया निंतिं गृहमन्त्रालय, नेपाल प्रहरी, सशस्त्र प्रहरीं म्हितूगु भूमिकायात च्वछानादिल।

राजदूत थम्प्सनं लिपांगु इलय् एमसिसी परियोजनाया विरुद्धय् जुयाच्वंगु बयानबाजी व एमसिए नेपालं छुंछुं थासय् मछिनाच्वंगु विषयय् च्यूताः प्वंकादिल । उगु सम्बन्धय् मन्त्री अर्यालं आःया सरकार न्हापाया सरकार, संसदं याःगु प्रतिबद्धता पूवंकेत तयार दूगु धयादिल।

उगु झ्वलय् राजदूत थम्पसनं नेपालय् दुपिं शरणार्थी सम्बन्धी च्यूताः तयादीगु व मन्त्री अर्यालं नेपालं फुक्क कथंया मानवअधिकारयात हनेगु धयादिल। लिसें गृहमन्त्रालयं निर्वाचन आयोगलिसे सुरक्षाया विषयय् परामर्श यानाच्वंगु मन्त्री अर्यालया धापू खः।

Categorized in राष्ट्रिय