जेनजी विद्रोह लिपा सुशीला कार्कीया नेतृत्वय् सरकार गठन जूगु लच्छि दये धुंकूगु दु। नागरिक नेतृत्वया सरकारं फागुन २१ गते प्रतिनिधिसभाया चुनाव यायेगु प्रक्रिया न्ह्याकेधुंकूगु दु । थ्व बाहेक विद्रोहया इलय् जूगु दमन व विद्रोहीतय्सं याःगु आगजनी व तोडफोडया अनुसन्धान यायेत गठन याःगु आयोगं नं ज्या न्ह्याकूगु दु।

भ्रष्टाचार नियन्त्रण व सुशासन सुनिश्चित जुइगु कथं ज्या यायेगु आःया सरकारया निंतिं हाथ्या खः। चुनावया प्राविधिक, कानूनी व व्यवस्थापकीय तयारी यायेगु मू जिम्मेवारी सरकारयाके दुसां चुनावय् ब्बति काइगु धाःसा राजनीतिक दलत हे खः। तर फुक्क राजनीतिक पार्टीतय्सं चुनावय् ब्बति काइगु खः कि मखु धकाः आः हे धाये मफु। अथे जूगुलि घोषणा जूगु तिथिइ चुनाव जुइ कि मजुइ धइगु शंका यायेगु थाय्  दनि। सुरक्षित, निष्पक्ष व निर्भय वातावरणय् चुनाव याये फइगु वातावरण दयेकाः अनं लिपा चुनावय् वनेगु स्वयां बांलाःगु विकल्प मेगु मदु।

चुनावपाखें संविधानयात हाकनं लँपुइ हयेफइ। यदि चुनाव मजुल धाःसा आःया संविधान ट्रयाक स्वयां यक्व पिहां वनिइगु ग्याःचिकू दु। जेनजी विद्रोहया मू आधार धइगु राज्य संचालन यायेगु विधिइ असन्तुष्टि खः। २०७२ सालय् संविधान जारी जुइवं गुगु समृद्धिया नारा थ्वयेकूगु खः, उकिं जनजीवनय् हिउपाः मवःगु जक मखु, सामान्य जीवनयापन यायेत विदेशय् वनेमाःगु ल्याय्म्हतय्गु बाध्यताया कारणं निराशा ब्वलंगु खः।

उकिं थुकथं विस्फोट जूगु कथं कायेमाः। जेनजी याःगु विद्रोह थःपि राज्य सत्ताय् वनेगु मखु। विघटन जूगु प्रतिनिधिसभाया दलपाखे धाःसा थुगु विद्रोहयात आः तक नं स्वीकार याये फयाच्वंगु मदुनि । छुं छुं नेतातय्गु सार्वजनिक अभिव्यक्ति बाहेक नेपाली कांग्रेस दुने तकं अलमल व कुण्ठा खनेदूगु दु । माओवादी केन्द्रया अध्यक्ष पुष्पकमल दाहाल ’प्रचण्ड’ पार्टीया अध्यक्ष पदं मत्वःतेगु शर्तय् छुं नं खँ स्वीकार यायेत तयार खनेदु । थुकिं यानाः देय् द्वन्द्वपाखे वनीगु आशंका ब्वलंगु दु । चुनावया निंतिं राजनीतिक पार्टीतय्सं सहकार्य मयायेगु व चुनाव याये मफुत धाःसा संविधानया भविष्य संकटय् लाइ।

अज्याःगु अवस्था वल धाःसा आःया सरकारया निंतिं जक मखु स्वयं बहुदलीय पार्टीतय्गु नीति नं असफल जूगु कथं काइ। चुनाव शान्तिपुर्ण जुइ कि मज्यु थ्व छगू हाथ्या जुइफु । छाय् धाःसा आन्दोनलया झ्वलय् पुलिस तयेगु हतियार लुते याना यंकूगु आःतक लित कायेफुगु मदुनि । जेल तछ्याना बिस्यु वःपि आः तक जेलय् लिहा वःगु मदुुनि। सरकारं शान्तिपुर्ण धगं गुकथं चुनावया नीतिं राजनीतिक पार्टीतय्त विश्वास बीफइगु खः धइगु खँ ल्यनाः हे च्वंगु दु।