नेपाली काग्रेस केन्द्रीय कार्यसमितिया बैठक थौं च्वनेत्यंगु दु। थौं न्हिनसिया १ ताःई निसें पार्टी केन्द्रीय ज्याकुथि, बिपी स्मृति भवन यलय् बैठक च्वनेत्यंगु दु।

कांग्रेस बैठक वंगु असोज २८ गतेनिसें न्ह्याःगु खः। बैठक वंगु भदौ २३ व २४ गते जूगु ‘जेनजी’ प्रदर्शन, अन्तरिम सरकार गठन व प्रतिनिधिसभा विघटन लिपा ब्वलंगु राजनीतिक अवस्था व पार्टीया भूमिकाया विषयय् केन्द्रीत जूगु धयातःगु दु। थौंया बैठकय् पार्टीया १५ क्वःगु महाधिवेशनया विषयय् केन्द्रीत जुयाः सहलह न्ह्यायेत्यंगु दु। आः सभापति शेरबहादुर देउवा नेतृत्वय् दूगु् कार्यसमितिया कार्यकाल मङ्सिरया दुने फुइत्यंगु दु।

थ्व अवस्थाय् न्हापांनिसें हे पार्टीया नियमित महाधिवेशन यायेगु बाय् मयायेगु विषयय् खँलाबला जुयाच्वंगु दु। नियमित महाधिवेशन मजुइगु अवस्थाय् विशेष महाधिवेशन यायेमाःगु मागलिसें छुं नेतापिंसं महाधिवेशन प्रतिनिधिया ल्हाःचिं अभियान सञ्चालन याःगु खः। उगु झ्वलय् ५४ प्रतिशत महाधिवेशन प्रतिनिधिं विशेष महाधिवेशनया निंतिं ल्हाःचिं तःगु धाःगु दु।

थ्व स्वयां न्ह्यः असोज २८ गते न्ह्याःगु बैठकय् पार्टी सभापति शेरबहादुर देउवां उसाँय्या अवस्थायात क्यनाः उपसभापति पूर्णबहादुर खड्कायात कार्यवाहक सभापतिया भाला बियादीगु खः। उकिया लिपा वय्कःया सभापतित्वय् कार्यसमितिया बैठक च्वनेगु यानाच्वंगु दु। थ्वहे दथुइ स्वन्ति नापं छठ पर्व लाःगुलिं थ्वहे कात्तिक १ गतेया लिपांगु बैठकं पूर्वकेन्द्रीय दुजः ऋषिकेश गौतम मदूगुलिं शोक प्रस्ताव पारित यानाः मेगु बैठक थौंया निंतिं क्वःछ्यूगु खः।

Categorized in राजनीति