काठमाडौँ उपत्यका अपराध अनुसन्धान ज्याकुथि टेकुया पुचलं चाइनिज पेस्टोल व १२ राउण्ड गोलीलिसें निम्हेसित ज्वनाः सार्वजनिक याःगु दु। नुवाकोट लिखु गाउँपालिका–६ छेँ जुयाः येँ महानगरपालिका–१७ नयाँबजार च्वनीम्ह २३ दँ दुम्ह समिर श्रेष्ठ व काभ्रेपलाञ्चोक पनौती नगरपालिका–१० खोपासी छेँ जुयाः येँमनपाय् च्वनेगु यानाच्वंम्ह १६ दँ दुम्ह एलेक्स नेपालीयात ज्वनाःगु धकाः उपत्यका अपराध अनुसन्धान ज्याकुथि टेकुया प्रवक्ता लिसें प्रहरी उपरीक्षक काजीकुमार आचार्यं धयादिल।

वय्कलं धयादिल, “येँया इचङ्गुनारायण देगः जःखः ल्वाभः क्यनाः सर्वसाधारणतय्त आतङ्क ब्वलंकल धइगु विशेष सुचंया लिधंसाय् जिमिगु पुचलं उमित येँया ढल्कों ज्वंगु खः।”उपिंनापं प्रहरीं मोडेल ५३४ कल ७.६२–२५ एमएम ५०००००९८ पोलि टेक्नोलोजीज इंक चीन च्वयातःगु पेस्टोल छगू, वहे पेस्टोलया खाली म्याग्जिन छगू व ३११–२३ च्वयातःगु गोली १२ राउण्ड ज्वंगु उपत्यका अपराध अनुसन्धान ज्याकुथिं धाःगु दु।

उपिं निम्हेसितं हातहतियार लिसें खरखजनासम्बन्धीया द्वपनय् थप अनुसन्धान लिसें माःगु कारबाहीया निंतिं जिल्ला प्रहरी परिसर भद्रकाली, येँय् छ्वयाःगु धकाः प्रवक्ता आचार्यं धयादिल।

Categorized in अपराध