न्हिच्छि मध्यम वा वयाः थौं चान्हय्निसें तसकं वा वइगु सम्भावना दु। जल नापं मौसम विज्ञान विभागया मौसमविद् सञ्जीव अधिकारीया कथं २४ घौया ई दुने ४० मिलिमिटर वा वःगु दु। “थुकियात मध्यम वा वःगु धाइ, ५० मिलिमिटर वा वल धाःसा जक तसकं वा वःगु धायेगु जुइ”, मौसमविद् अधिकारीं धयादिल, “थौं चान्हय्निसें धाःसा तसकं वा वइगु सम्भावना दु।”

वय्कलं थौं न्हिच्छि हे बाग्मती, कोशी, मधेस प्रदेशलिसें ख्यलय् मध्यम वा वयाच्वंगु धयादिल। गुकिइ गण्डकी व लुम्बिनीइ छथाय्निथाय् फुतिफुति वा वयाच्वंगु वय्कलं जानकारी बियादिल। अथेहे गण्डकी, बागमती प्रदेशया उच्च हिमाली भेगय् च्वापु गायाः वा वःगु खः।बुधबाःनिसे वःगु वा कात्तिक १५ गते शनिबाः तक वइगु मौसम विज्ञान विभागं धाःगु खः।

थुकिया निंतिं सर्तकता नालाः सुरक्षित जुइत आह्वान नं याःगु खः। नेपालय् पदयात्राय् वनेत मौसम बारे जानकारी कयाः जक वनेत विभागं इनाप याःगु खः।अथेहे वा लयेगु ई जूगुलिं लये ल्यंदनिपिं किसानतय्सं मौसमया अवस्था स्वयाः जक लयेत सुझाः ब्यूगु खः। तसकं वा वइगु सम्भावना दूगुलिं वा लयेगु अवस्था मदूगु मौसमविद्तय् धापू खः।

Categorized in राष्ट्रिय