राष्ट्रपति रामचन्द्र पौडेल कतारया राजधानी दोहाय् थ्वहे कात्तिक १८ गतेनिसें २० गतेतक जुइगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत उखे झायादीत्यंगु दु।

कतारया अमिर शेख तमिम बिन हमद अल थानीया ब्वनाय् झिंनिम्ह दुजःया नेपाली प्रतिनिधिमण्डलया नेतृत्व यासें वय्कः सम्मेलनय् ब्वति कायेत सोमबाः उखे झायादीत्यंगु परराष्ट्र मन्त्रालयया सचिव अमृतबहादुर राईं धयादीगु दु । राष्ट्रपति पौडेलं कात्तिक १८ गते सम्मेलनया मुख्य सत्रयात सम्बोधन यानादीत्यंगु ज्याधलः दु। संयुक्त राष्ट्रसङ्घ, महासभाया निर्णयकथं जुइत्यंगु उगु सम्मेलन दुजः देय्या निंतिं तसकं महत्वपूर्ण जुइगु विश्वास यानातःगु दु।

भ्रमणया बारे जानकारी बिइत थौं मन्त्रालयय् ग्वसाः ग्वःगु पत्रकार सम्मेलनय् सचिव राईं स्विदँ लिपा जुइत्यंगु सम्मेलनया महत्व व गरिमाकथं नेपाःपाखें राष्ट्रपतिं ब्वति कयादीत्यंगु धयादिल। सम्मेलनया झ्वलय् राष्ट्रपति पौडेलं कतारया अमिर व संयुक्त राष्ट्रसङ्घया महासचिव एन्टोनियो गुटेरेसलिसें थीथी विशिष्ट व्यक्तित्वपिंनाप नापलानादीत्यंगु दु।

थ्व सिबें न्ह्यः उगु सम्मेलन सन् १९९५य् डेनमार्कया कोपनहेगनय् जूगु खः। थुगुसी कतारं सम्मेलन ग्वसाः ग्वःगु खः। सम्मेलनय् आःया विश्वं फयाच्वंगु विकास असमानता, जनसङ्ख्याय् वःगु असन्तुलन व प्रविधिया हुनिं समाजय् लाकूगु लिच्वः लिसें थीथी विषयय् थीथी कोणय् दुग्यंकं सहलह जुइगु धयातःगु दु। सम्मेलनं सामाजिक विकासया निंतिं मंकाः ज्या व ग्वाहालिया विषयय् मंकाः प्रतिबद्धता प्वंकीगु धयातःगु दु। सन् १९५५य् संयुक्त राष्ट्रसङ्घया दुजः जुइधुंकाः नेपाः शान्ति व स्थायित्वया निंंितं न्ह्याबलें सक्रिय व प्रतिबद्ध जुयाः वयाच्वंगु दु।

आः नेपाः राष्ट्रसङ्घया आर्थिक लिसें सामाजिक परिषद्या नायः जूगुलिं नं सम्मेलनय् ब्वति काइगु अर्थपूर्ण जू। कतारया औपचारिक भ्रमण क्वचायेकाः राष्ट्रपति पौडेल थ्वहे कात्तिक २० गते स्वदेश लिहांझाइगु मन्त्रालयं धाःगु दु।

Categorized in राष्ट्रिय