प्रधानमन्त्री सुशीला कार्कीं झीगु देय् दयेकेगु भाला झी सकसियागु जूगु धयादीगु दु। प्रधानमन्त्री निवास बालुवाटारय् म्हिगः जूगु न्हय्गूलिं प्रदेशया मुख्यमन्त्रीलिसेया बैठकय् वय्कलं धयादिल, “झी सकलें जानाः देय् दयेकेगु खः।

झीसं भिंके मफुसा मेपिंसं भिंकः वइमखु। अथे जुयाः गुजाःगु समस्यात दु, सकलें जानाः ज्यंकेनु।”प्रधानमन्त्री कार्कीं थः राजनीतिक नेता मखूगु व परिस्थितिं थन थ्यंकाब्यूगु धयादिसें वंगु भदौ २३ गते न्ह्यःतकला थुजाःगु अवस्था वइ धकाः बिचाः तकं मयानागु धयादिल। जेनजीपिनिगु न्हापांगु माग भ्रष्टाचार नियन्त्रण, सुशासन न्यंकेगु व सामाजिक सञ्जालय् याःगु प्रतिबन्ध लिकायेगु जूगु धयादिसें वय्कलं आः वयाः थीथी कथंया जेनजीपिं खनेदूगु व सकसिया माग नं ब्यागलं ब्यागलं कथंया न्ह्यनेवयाच्वंगु धकाः धयादीगु वय्कःया सचिवालयं धाःगु दु।

“गुलिखय् जेनजी थन वयाः ततःधंगु खँ ल्हानाः वनी। गुलिखय् थन दुने सुम्क च्वनाः, पिहांवनाः मती वःवःथे नवाइ । न्ह्यागु हे जुसां झी हे सन्तानपिं खः”, प्रधानमन्त्री कार्कीं धयादिल, “सयेकाच्वंगु दु। गुलिसिनं ला परिपक्व खँ नं ल्हाइ। झिसंसिबें गुलिला उमिसं यक्वः स्यू।”प्रधानमन्त्री कार्कीं थःपिं प्रदेश सरकारलिसे मंकाःज्या यानाः हे न्ह्याः वनेगु धयादिसें संविधानं ब्यूगु परिधि दुने हे च्वनाः ज्या यायेगु धयादिल। संविधानं दयेकूगु संरचनायात हनेमाःगु वय्कःया धापू दु। “स्थायित्वया निंतिं निर्वाचित सरकार हे माः। निर्वाचन व राजनीतिक दल छगू संस्था मेगु नाप स्वानाच्वंगु दु।

राजनीतिक दल मदुसा थ्व व्यवस्था नं दइमखु। अथे जुयाः स्वतन्त्र विज्ञ धकाः नांजाःपिं नं चुनाव ल्वायेत दल दयेकाच्वन”, वय्कलं धयादिल, “जेनजीपिंत नं पार्टी चायेकाः चुनावय् ब्वति का व थःगु ऐजन्डा जनतापाखें अनुमोदन याकी धयागु दु। सुं सुं लँ तंपिं दुसा, सुं उग्र नं दु। उमिसं ईया संवेदनशीलता व अन्तरिम सरकारया सीमा थुइकेमाः।”निर्वाचनया वातावरण दयेकेगु सरकारया मुख्य प्राथमिकता जूगु धयादिसें प्रधानमन्त्री कार्कीं सुरक्षा निकायया निंतिं बन्दोबस्तीया फुक्क सामान व्यवस्था याये त्यनागु धयादिल। “प्रहरीया निंतिं माःग गाडी न्यायेगु प्रक्रिया न्ह्याये धुंकूगु दु।

जःला खःला देय्पिंसं नं सवारीसाधन बिइत्यंगु दु। छुं छुं मित्रराष्ट्रं आर्थिक ग्वाहालि यायेगु बचं ब्यूगु दु”, वय्कलं धयादिल। आन्दोलनय् क्षतिग्रस्त जूगु प्रहरीया ९० प्रतिशत संरचना स्थानीय जनतां हे दयेकाब्यूगु धयादिसें प्रधानमन्त्री कार्कीं थुकिं प्रहरीया मनोबल थकायेत व जनतानापया स्वापू अझं क्वातुकेत ग्वाहालि याःग धयादिल।प्रधानमन्त्री कार्कीं धयादिल, “थ्वसिबें नं तसकं प्रतिकूल अवस्थाय् नापं चुनाव जूगु दु। जेनजीपिंसं नं चुनाव जुइमाः व आःया हे अवस्थाय् यायेफइ धकाः धाःगु दु। दलपिं नापया संवादं अझं अप्वः चुनावया पक्षय् वातावरण दयावंगु तायेकागु दु।”

निर्वाचनयात माःगु १२० ताजि सामानतमध्ये ९० प्रतिशतसिबे अप्वः दूगु व ल्यंगु व्यवस्थापन यायेत्यनागु प्रधानमन्त्री कार्कीं धयादिल । आयोगं नं क्वःछिनातःगु इलय् हे चुनाव याकेफइगुलिं पूवंकं विश्वास ब्यूगु वय्कलं धयादिल।

Categorized in राष्ट्रिय