मेयर साह न लोकप्रियता म्हो जुइवं मेगु स्टन्ट छाय् चिइकल
लहनान्युज | कछलाथ्व चतुर्दशी ११४६, कार्तिक १८ मंगलवाः
सामाजिक सञ्जालय् च्वयाः चर्चाय् वयाच्वनिम्ह येँ महानगरपालिकाया मेयर बालेन साह थम्हं च्वःगु स्टाटसया कारणं हाकनं छकः चर्चाया केन्द्र बिन्दुइ लानाच्वंगु दु । मेयर साहं सामाजिक सञ्जालय् अश्लिल पोष्ट यायेवं उकियात कयाः आलोचना जूगु खः ।
मेयर साहं अमेरिका, चीन, भारत लिसे नेपाली कांग्रेस, एमाले, माओवादी केन्द्रयात नां च्वयाः हे अज्याःगु अश्लिल पोष्ट याःगु खः । शनिवाः चान्हय् १२ बजे पोष्ट याःगु खःसा छुं ई लिपा हे उकियात चीकेगु ज्या जूगु खः । तर मेयर साहं थःगु पाखें याःगु पोष्ट चीकूसां सामाजिक सञ्जालय् फेसबुकय् धाःसा भाइरल जुइधुंकूगु खः ।
मेयर साहया पोष्टयात कयाः शिक्षा विज्ञान तथा प्रविधि मन्त्री महावीर पुनं मेयर साहयात लक्षित यासें च्वःगु दु, ‘छुं आशा यानातःपिं अभियन्ता व न्ह्यलुवातय्सं इलय् ब्यलय् ‘सर्को’ सालाः न्ववाःगु व च्वःगु थें च्वं । सर्को साःसां नं छुं मपाः । तर सर्को सालेधुंकाः छुं न्वमवायेत व मच्वयेत इनाप यानाच्वना ।’
उकथं हे चर्चित कलाकार ज्योति मगरं च्वःगु दु, ‘गरिबी को चमेली बोल्दिने कोइ छैन’ धासें गरिबया ठेला तयेके मजिल, जिं नेपाः न्हिलाच्वंगु स्वये चाहे जू धासें जेन्जीयात उक्से यानाः सर्लक्क हे देय् च्याकेगु ज्या यात ... गुगु गुग शक्तिया तिबलय् फिल्मी स्टाइलय् बितन्दा न्यंकल उगु हे शक्तिं कयेच्यायेवं असन्तुष्टि छर्लङग... चान्हय् १२ बजे म्हूतु वायेबलय् जुइगु फाइदा
१) नुगलय् सुलाच्वंगु तं पिहां वल
२) गुगुं शक्तिं परिचालिन मखु धइगु प्रमाण
३) गजिया क्वालिटी पर्फेक्ट जूगु प्रमाण
बुढीयात स्यायेत स्वःगु खः काल पल्के जुल ब्रो
धन्न सु सु यायेत दनावंम्ह तताजुं बाघौ दुने हे सियाः डिलेट याके बिल मखुसा गुलि आपाः भिउज, लाइक, कमेन्ट वइगु ...
छिगू स्टाटस डिलेट जुइधुंकाः छितः थ्व म्येयाा हरफ देछाना
भक्ततय् चमेली न्ववाइपिं सुं मदु
जिं भक्तजन न्हिलाच्वंगु स्वये चाहे जू ।
सीदु कथं मेयर साहं कमेन्ट च्वय् न्ह्यः शनिवाः न्हिनय् निसें यलया छगू रेष्टरेन्टय् च्वनाः अय्ला त्वंगु खः । उगु रेष्टुरेन्टय् मेयर साहं अय्ला त्वनाः बांलाक न्यासि तकं वने मफुगु खँ छम्ह पत्रकारं सामाजिक सञ्जलाय् पोस्ट यानाः स्पष्ट याःगु खः ।
जेनजी आन्दोलनया कारणं अलोकप्रिया जूम्ह येँ महानगरपालिकाया मेयर साहं थःगु अलोकप्रियता म्हो यायेगु निंतिं जेनजी आन्दोलन लिपा थीथी ज्या यानागु धकाः पोस्ट यायेगु यानाच्वंगु खः । तर उलि यानाः नं थःगु लोकप्रियता झन जक कुहां वनेवं हीमी चाःम्ह मेयर अय्लया सुरय् उगु पोस्ट याःगु जुइफइगु खँ सम्बन्धित मनूतय्सं धाःगु दु ।
छखे स्वनिगःया फोहोर वायेगु थाय् बन्चारेडाँडाया स्थानीय वासिन्दां थ्व स्वयां न्ह्यः येँ महानगरपालिकाया मेयर साह व स्थानीय वासिन्दा दथुइ जूगु झिंच्यागू बुँदायात मेयर साहं पालना मयाःगु धासें फोहोर वायेगुलिं पंगः थनेवं हीमी चायाच्वंगु खः ।
बन्चरेडाँडाया वासिन्दायात सरकारं वार्ताया निंतिं सःतूगु खःसा उगु वार्ताय् नं मेयर साह उपस्थिति मजूगु खः । वयां लिपा स्थानीय वासिन्दां सरकारं सःतूगु बैठकय् मेयर साहयात माःगु खः । तर मेयर साह उपस्थित मजुइवं स्थानीय वासिन्दा वार्ता त्वःताः लिहां वंगु खः । तर म्हीग सहरी विकास मन्त्री कुलमान घिसिङ थः स्वय्म बन्चरेडाँडाय् वनाः स्थानीय वासिन्दा लिसे सहमति कार्यान्वयन यायेगु सहमति यायेवं स्थानीय वासिन्दां फोहोर वाके बिउगु खः ।
Categorized in राष्ट्रिय
