नेपाःया क्रिकेटं हाकनं छकः सकें नेपाःमि लय्तायेकूगु दु। ओमानय् जूगु आइसीसी टी–२० विश्वकप एसिया व इस्ट एसिया प्यासिफिक ल्यज्याय् निगू कासा न्ह्यः हे नेपाः सन् २०२६ सं जुइगु विश्वकपय् ल्यःगु दु । नेपाःया निंतिं थ्व सफलता अत्यावश्यक नं खः। थौंकन्हय् राजनीतिक अस्थिरताया जक चर्चा जुयाच्वंगु नेपाःया चर्चा बांलाःगु कारणं विश्वय् जुल । थुकिया निंतिं नेपाःया क्रिकेटयात सुभाय् बीमाः।

नेपालं समग्रय् स्वक्वःखुसी व लगातार निक्वःखुसी आइसिसी टि–२० विश्वकपय् म्हिती। टि–२० विश्वकपया झिगूगु संस्करण सन् २०२६ या फेब्रुअरी–मार्चय् भारत व श्रीलंका मंकाः कथं ग्वसाः ग्वःगु खः। नेपाः प्रतियोगिताय् अपराजित छगू जक टिम खः। समूह चरणय् जापान व कुवेतयात बुकेधुंकाः नेपालं सुपर सिक्सय् घरेलु टिम ओमान, सयुक्त अरब इमिरेट्स (युएइ), कतार व समोआ पुलिं चुइकूगु खः। नेपाः टि–२० विश्वकपय् छनोट जक जूगु मखु अपराजित जुयाः च्याम्पियन नं जुल।प्रतियोगिताय् नेपालं खुगू कासा त्याकाल। समूह चरणं निगू अंक कयाः न्ह्याःगु नेपालं सुपर सिक्सय् दकलय् अप्वः झिगू अंक दयेकल ।

उपविजेता घरेलु टिम ओमान च्यागू व स्वंगूगु थासय् संयुक्त अरब इमिरेट्स (युएईं) खुगू अंक काःगु दु। सुपर सिक्सय् प्यंगू अंक दयेकूगु कतार प्यंगू, निगू अंक दयेकूगु जापान न्यागूगु व फुक्कं कासा बूगु सामोआ लिपांगु धलखय् लात। हरेक कासाय् बिस्कं कासामि नायक जुयाः न्ह्यःने वल। गुलसन झा फुक्कं धयाथें कासाय प्रभावशाली प्रदर्शन यात। दिपेन्द्रसिंह ऐरीं बलिङ व फिल्डिङ विशेष योगदान बिल। सोमपाल कामीं महत्वपूर्ण इलय् विकेट काल। सन्दीप लामिछानेया लिपांगु निगू कासाय् शानदार बलिङ यात। कुशल भुर्तेलं कासाया इलय् बांलाक ब्याटिङ यात।

आसिफं नं ब्याटिङय् उलि हे योगदान यात। कप्तान रोहितं नं प्रेरणादायी नेतृत्व यात।रोहितया कथं प्रशिक्षक स्टवार्ट लले खेलाडीतय्त स्वतन्त्र जुयाः म्हितेत अनुमति बिल। अथेजुयाः नं फुकस्यां स्वभाविक कासा म्हितल। रोहित च्याम्पियन जुल । सहप्रशिक्षक ज्ञानेन्द्र मल्लसहित फुक्कं सपोर्टिङ स्टाफतय्त नं थुगु उपाधि त्याःगु श्रेय बिल। थुकथं हे ओमानय् दर्शकतय् उपस्थितिं प्रत्येक कासाय् नेपाःया कासामीतय्त प्रेरणा बीगु ज्या यात। प्यला लिपा भारतय् अझ अप्वः नेपाःमि दर्शकया अपेक्षा याःगु दु। कप्तान रोहितं विश्वकपय् भारत लिसे भारतय् हे म्हितेगु इच्छा प्वंकूगु दु।

वय्कलं उपाधि त्याकेधुंकाः धयादिल, ‘भारतय् भारतलिसे म्हिते खन धाःसा जिगु टिम व नेपाःया समर्थकया निंतिं तःधंगु लसता जुइ।’नेपालं न्हापांखुसी सन् २०१४ सं टि–२० विश्वकप म्हितूगु खः। नेपालं विश्वकपय् न्हापांगु ब्वतिइ हे अनपेक्षित रुपय् निगू कासा त्याकाः विश्वयात प्रभावित याःगु खः। वयां लिा नेपाःया क्रिकेट समर्थकया हरेक पटक नेपालं मेगु विश्वकप क्रिकेट म्हितिइ धैगु अपेक्षा तयेगु यात तर नेपाःयात मेगु विश्वकप म्हितेत झिदँ ई काल। नेपालं सन् २०२४ सं अमेरिका व वेस्ट इन्डिजय् जूगु लिपांगु विश्वकपय् म्हितूगु खः। उगु विश्वकपय् नं नेपाःया चर्चा जूगु खः।

नेपाःया क्रिकेटं हाकनं छकः विश्वकपया मञ्चय् थःगु क्षमता क्यनेगु ह्वःताः चूलागु दु। न्ह्यानाच्वंगु विश्वकप छनोटय् याःगु प्रदर्शन व थ्व स्वयां न्ह्यः निक्वः तक विश्व विजेता वेस्ट इन्डिज विरुद्ध टि–२० शृङखय् त्याकाः इतिहास दयेकूगुलिं नं वइगु विश्वकपय् नेपाः स्वयेबहःगु टिमया कथं न्ह्यःने वइगु पक्का दु। विश्वकप छनोटय् असाधारण प्रदर्शनया निंतिं घरेलु क्रिकेटया सर्वोच्च संस्था नेपाल क्रिकेट संघ (क्यान) नं प्रशंसाया हकदार खः। क्यानं विश्वकपया तयारी कथं थुगुसी धात्थें न्ह्यथने बहः कथं तयारी याःगु खः। विश्वकप छनोटया निंतिं नेपालं भारतय् प्रशिक्षण याःगु खः ।

वयां लिपा लछि तक अस्ट्रेलिया भ्रमणय् नेपाल क्रिकेट टिम वन । उगु भ्रमणय् नेपालं विश्वया झिंछगू स्तरीय टिमं ब्वति काःगु टप एन्ड टी–२० सिरिजय् म्हितूगु खः। थ्वहे महिनाय् क्यानं विश्वकप छनोटया तयारी कथं युएइइ निक्वः तक विश्वविजेता वेस्ट इन्डिजलिसे द्विपक्षीय शृङ्खला ग्वसाः ग्वल। नेपालं आइसीसीया पूर्णं सदस्य राष्ट्र लिसे द्विपक्षीय शृङ्खला म्हितूगु थ्व न्हापांखुसी खः। तःधंगु राष्ट्र लिसेया न्हापांगु शृङ्खला हे त्याकाः नेपालं तःधंगु उपलब्धि चूलाकूगु खः। थ्व लिच्वलं नेपाःया टिम विश्वकप छनोट कासा म्हितेत उच्च मनोबल ज्वनाः ओमान वंगु खः। विशेष उाना? टेस्ट मान्यता दुगु वेस्ट इन्डिज विरुद्धया शृङ्खला त्याकेधुंकाः नेपाःया कासामितय्के गुगुं नं टिमयात बुके फइ धइगु आत्मविश्वास ब्वलंगु खः।

नेपालं विश्वकप छनोट प्रतियोगिताय् हे १ नम्बर टिमया रुपय् थःत न्ह्यब्वल।विश्वकपया थाकूगु लँपु न्ह्यायेत क्यानं गुकथं योजना दयेकल थुकिं क्यानया सक्षमता व दुरदर्शीतायात नं क्यना बिउगु दु। वंगु इलय् नेपाःया क्रिकेटया उपलब्धी हे खेलाडीया मिहिनेत, त्याग व तपस्यां जक सम्भव दु धाइगु खः। तर आः क्यान नेपाःया न्ह्यथने बहःगु संघ जूगु दु। थ्व पालय् चूलाःगु सफलता खेलाडी व प्रशिक्षकया कारणं जक मखु क्यानया व्यवस्थापन चुस्तता, योजना व दुरदर्शीतां सम्भव जूगु खः धाःसां पाइ मखु। एसोसिएट राष्ट्रं ताः ई तक सफलतायात ल्यंकातःगु इतिहास मदु ।

विश्वकप म्हितेधुंकूगु केन्या, बर्मुडा थेंज्याःगु देय् थुकिया ज्वलन्त दसु खः। तर नेपाःयात विश्वं थ्व धखलय् तःगु मदुनि। विश्व क्रिकेटं नेपाःयात टेस्ट मान्यता कायेफइगु टिमया रुपय् काःगु दु। अथेजुयाः आः नेपाःया क्रिकेटयात बांलाःगु लँपुइ यंकेगु जिम्मेवारी क्यानया लिसे सरकारया नं दु। थुकिया निंतिं क्यानं घरेलु क्रिकेट संरचनायात फयांफछि ताःहाककेमाः। राष्ट्रिय क्रिकेटर जक मखु स्थानीय क्रिकेटरयात नं प्यला, न्याला प्रतियोगिताय् व्यस्त यायेमाः। दुई दिवसीय, एक दिवसीय व चीधंगु संरचनाया टि–ट्वान्टी लगातार यायेमाः। भौतिक संरचनाय् अझ लगानी यायेमाः। सरकार व क्यानं त्रिवि अन्तर्राष्ट्रिय क्रिकेट मैदानया स्तरोन्नतिइ गुकथं मिहिनेत याःगु दु उकथं हे मेगु भौतिक पूर्वाधार नं थनेगु ज्या यायेमाः। थथे जुल धाःसा नेपाःया क्रिकेट दिगो रुपय् न्ह्याःवनी।