कतारया राजधानी दोहाय् जूगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत झाया च्वनादीम्ह राष्ट्रपति रामचन्द्र पौडेलं म्हिगः अनया कतार राष्ट्रिय सङ्ग्रहालय नापं इस्लामिक कला सङ्ग्रहालयया अवलोकन यानादीगु दु।

उगु झ्वलय् राष्ट्रपति पौडेलयात सङ्ग्रहालयया अधिकारीपिंसं लसकुस यासें अनया बारेय् जानकारी बियादीगु धकाः राष्ट्रपतिया प्रेस सल्लाहाकार किरण पोखरेलं धयादिल। राष्ट्रपति पौडेल कतारया राजधानी दोहाय् मङ्गलबाःनिसें जूगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत नेपाली प्रतिनिधिमण्डलया नेतृत्व यासें सोमबाः अन थ्यंकादीगुु खः।

कतारया अमिर शेख तमिम बिन हमद अल थानीया ब्वनाय् ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेगु निंतिं राष्ट्रपति पौडेल अन थ्यंकादीगु खः। वय्कलं संयुक्त राष्ट्रसङ्घया महासभाया निर्णय कथं कतारया दोहाय् जूगु ‘सामाजिक विकासया निंतिं निक्वःगु विश्व शिखर सम्मेलन’या मुख्य सत्रयात मङ्गलबाः सम्बोधन यानादिल।

लिसें वय्कलं सम्मेलनअन्तर्गत अन ग्वसाः ग्वःगु सामाजिक विकासया स्वंगू थांतयेगु सुदृढीकरण ः गरिबी निवारण, पूवंकं व उत्पादनशील लजगाः लिसें सकसिया निंतिं मर्यादित ज्या व सामाजिक समावेशीकरण विषयय् उच्चस्तरीय गोलमेच सम्मेलनयात नापं सम्बोधन यानादीगु खः।राष्ट्रपति पौडेलं मङ्गलबाः हे संयुक्त राष्ट्रसङ्घया महासचिव एन्टोनियो गुटेरेसनाप नापलाना दीगु खः।

थ्वसिबें न्ह्यः उगु सम्मेलन १९९५य् डेनमार्कया कोपनहेगनय् जूगु खः। सम्मेलनय् वर्तमान विश्वं फयाच्वंगु विकासया असमानता, जनसङ्ख्याय् वःगु असन्तुलन व प्रविधिया हुनिं समाजय् लाकाच्वंगु लिच्वःलिसेंया विषयय् सहलह जूगु खः। भ्रमण क्वचायेकाः राष्ट्रपति पौडेल थौं स्वदेश लिहाँ झायादीत्यंगु दु।

Categorized in राष्ट्रिय