राष्ट्रपति रामचन्द्र पौडेल कतारया राजधानी दोहाय् मङ्गलबाःनिसें न्ह्याःगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कयाः थौं स्वदेश लिहाँझाःगु दु।वय्कःयात त्रिभुवन अन्तरराष्ट्रिय विमानस्थलय् उपराष्ट्रपति रामसहायप्रसाद यादव, प्रधानमन्त्री सुशीला कार्की, गृहमन्त्री ओमप्रकाश अर्याल, परराष्ट्र सचिव अमृतबहादुर राई, नेपाःया निंतिं कतारया राजदूत, सुरक्षा निकायतय् प्रमुखलिसेंपिंसं लसकुस यानादिल।

उगु झ्वलय् नेपाली सेनां राष्ट्रपति पौडेलया लसकुसय् सम्मान गारत देछाःगु खः।कतारया अमिर शेख तमिम बिन हमद अल थानीया ब्वनाय् ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत राष्ट्रपति पौडेल न्हापांम्ह मिसा सबिता पौडेललिसें नेपाःया प्रतिनिधिमण्डलया नेतृत्व यानाः सोमबाः दोहा झायादीगु खः।

वय्कलं संयुक्त राष्ट्रसङ्घया महासभाया निर्णयकथं दोहाय् जूगु ‘सामाजिक विकासया निंतिं निक्वःगु विश्व शिखर सम्मेलन’या मुख्य सत्रयात मङ्गलबाः संबोधन यानादिल। लिसें वय्कलं सम्मेलनअन्र्तगत ग्वसाःग्वःगु सामाजिक विकासया स्वगः थाःया सुदृढीकरण : गरिबी निवारण, पूर्ण व उत्पादनशील रोजगारी नापं सकसिगु निंतिं मर्यादित ज्या व सामाजिक समावेशीकरण विषयया उच्चस्तरीय गोलमेच सम्मेलनयात नं संबोधन यानादिल।

राष्ट्रपति पौडेलं मङ्गलबाः हे संयुक्त राष्ट्रसङ्घया महासचिव एन्टोनियो गुटेरेसयात नापलानादिल। पौडेलं बुधबाः कतार राष्ट्रिय सङ्ग्रहालयया नं अवलोकन यानादिल।

Categorized in राष्ट्रिय