गृहमन्त्री ओमप्रकाश अर्यालं थौं पूर्वराष्ट्रपति विद्यादेवी भण्डारीलिसे नापलानाः खँल्हाबल्हा यानादीगु दु।

गृहमन्त्री अर्यालं बालुवाटारया पूर्वराष्ट्रपति भण्डारीया निवासय् वनाः वय्कःयात नापलानाः अवस्था बुलुहुं सामान्यीकरण जुयावनाच्वंगु व सरकार सुरक्षाया पूर्ण प्रत्याभूति बियाः निर्वाचन यायेत तयार दूगु जानकारी बियादिल। पूर्वराष्ट्रपति भण्डारीं निर्वाचनय् दक्व दलतय्त ब्वति कायेकेत इनाप यानादिसें निर्वाचन इलय् हे जुलधाःसा देय्यात बांलाइगु धयादिल।

वय्कलं आःया अवस्थायात सुरक्षित अवतरण यायेमाःगु व परिस्थितियात स्वयाः न्ह्याःवनेत सुझाः बियादिल। थ्वस्वयां न्ह्यः, थौं हे गृहमन्त्री अर्यालं वंगु भदौ २३ व २४ गतेया जेनजी आन्दोलनया झ्वलय् मिँ च्याकूगु येँया चपलीइ च्वंगु पूर्वराष्ट्रपति भण्डारीया छेँया अवस्थाबारे स्थलगत जानकारी कयादीगु खः।

Categorized in राष्ट्रिय