येँ महानगरपालिका–८ जयबागेश्वरी, गायत्री मार्गय् च्वंगु ब्रह्मा देगः उत्खनन् लिपा पुनर्निमाण यानाः थौं उलेज्या जूगु दु। उगु देगःया थौं महानगर प्रमुख बालेन्द्र शाह (बालेनं) उलेज्या यानादिल।

उपप्रमुख सुनिता डङ्गोलं, प्राचीन स्मार कया जीवन कथं दूगु आकृति, मूर्ति नापं कलाकृति पुनरुत्थानपाखें सांस्कृतिक सहरया म्हसीका पुनःस्थापित यायेत योगदान बिइगु धयादिल। वय्कलं धयादिल, “गन मूर्तियात पुजा याइ। मूर्तियात अन हे तयेमाः। थुकियात जिमिसं अभियानकथं न्ह्याकायंकागु दु।”थ्व देगः तनाच्वंगु हे १०० दँ स्वयां अप्वः जुइधुंकूगु खः ।

येँमपा–८ या वडानायः नापं सम्पदा व पर्यटन समितिया कजि आशामान सङ्गतया कथं १९९० साल न्ह्यः हे देगः भग्नावशेष जूगु खः। अनंलिपा झाः जक दयाच्वंगु खः। पुरातत्व विभागया ग्वाहालिइ देगः उत्खनन यानाः थुकिया प्राचीनताया अध्ययन याःगु खः । सङ्गतं धयादिल, “अध्ययनं देगः खुगूगु शताब्दींनिसें न्हय्गूगु शताब्दीया दथुइ निर्माण जूगु अनुमान यानातःगु खः।

देगःया बनावट व प्रकृतिसम्बन्धी दस्तावेज मलूगुलिं जगया आकृति, छ्यलातःगु निर्माण सामग्रीया आधारय् पुरातत्वविद्तय्सं देगःया रेखाङ्कन याकाः पुनर्निर्माण याःगु खः।”प्रहरीया संरक्षणय् दूगु देगःदुने च्वंगु चतुर्मुख ब्रह्माया मूर्तियात पञ्चाङ्ग निर्णायक समितिं ब्यूगु साइतकथं थ्व हे कात्तिक १७ गतेया साइतय् प्रहरी परिसरपाखें रथारोहण यानाः देगलय् यंकाः पुनःस्थापना याःगु खः।

Categorized in राष्ट्रिय