सार्वजनिक सेवा प्रसारण (पिएसबी) नेपालं पलिस्थाया दच्छिगु यात्रा पूवंकूगु दु। नेपाल टेलिभिजन व रेडियो नेपालयात समायोजन यानाः रुपान्तरित पिएसबी नेपालं थौं पलिस्थाया न्हापांगु वार्षिकोत्सव न्यायेकेत्यंगु दु।

वार्षिकोत्सवया लसताय् राष्ट्रपति रामचन्द्र पौडेलपाखें ‘एनटिभी वल्र्ड’ औपचारिक कथं न्ह्याकादीत्यंगु पिएसबी नेपालया कार्यकारी अध्यक्ष डा महेन्द्र विष्टं धयादिल। नेपाल सरकारया आर्थिक दँ २०७८÷७९या बजेटय् नेपाल टेलिभिजनया अङ्ग्रेजी च्यानलया कथं ‘एनटिभी वल्र्ड’ सञ्चालन यायेगु ज्याझ्वः तःगु खः।

उगु च्यानलं नेपाल अन्तरराष्ट्रिय ख्यलय् नेपाः म्हसिकेगु सामग्री दुथ्याकीगु जूगु दु।हलिमय् सन् १९२० या दशकनिसें सार्वजनिक सेवा प्रसारण (पिएसबी)या कुतः न्ह्याःगु जुसां नेपालय् थुकिया परिकल्पना प्रजातन्त्रया पुनःस्थापना लिपा जूगु खः । विज्ञपिं दुथ्याःगु थीथी कार्यदल व सञ्चार सम्बन्धी आयोगतयेगु छ्याता लिसें सिफारिसनापंया लिधंसाय् सङ्घीय संसद्पाखें सार्वजनिक सेवा प्रसारणसम्बन्धी कानुनयात संशोधन व एकीकरण यायेत दयेकूगु विधेयक, २०८१ पारित जूगु खः। राष्ट्रपति पौडेलपाखें २०८१ असोज २२ गते विधेयक प्रमाणीकरण जूगु खः।

ऐनया व्यवस्थाकथं प्रमाणीकरण जूगु ३१ न्हुया दिं २०८१ कात्तिक २३ गतेनिसें थ्व कानुन कार्यान्वयनय् वःगु खः। थ्व ऐन कार्यान्वयनय् वयेगुनापं रेडियो प्रसार सेवा विकास (समिति) गठन आदेश, २०४१ अन्तर्गत नीस्वंगु रेडियो नेपाल व सञ्चार संस्थान ऐन, २०२८ कथं पलिस्था जूगु नेपाल टेलिभिजन सार्वजनिक सेवा प्रसारण संस्थाय् रूपान्तरण जूगु खः। ऐन कार्यान्वयनया झ्वलय् लोकसेवा आयोगया अध्यक्ष दूगु सिफारिस समितिया सिफारिसया लिधंसाय् २०८१ पुस १ गते पिएसबी नेपालया न्हापांगु नेतृत्वकर्ताया कथं डा विष्ट कार्यकारी अध्यक्षय् नियुक्त जुयादीगु खः।

थुगु संस्थां रेडियो नेपाल व नेपाल टेलिभिजन सार्वजनिक सेवा प्रसारणय् रूपान्तरण लिपा गुणस्तरीय, विश्वसनीय नापं प्रभावकारी विषयवस्तुलिसें जनउत्तरदायी सार्वजनिक सेवा प्रसारणया ज्या यानाः वयाच्वंगु दु। रेडियो नेपाल व नेपाल टेलिभिजनया एकीकृत विनियमावली तर्जुमालिसेंया ज्या धाःसा प्रक्रियाय् दु।

Categorized in राष्ट्रिय