रामचन्द्र पौडेलं सार्वजनिक सेवा प्रसारण (पिएसबी) नेपालं पलिस्थाया न्हापांगु वार्षिकोत्सवया लसताय् ‘एनटिभी वल्र्ड’या औपचारिक शुभारम्भ यानादीगु दु।

सिंहदरबारय् च्वंगु पिएसबी, नेपाल टेलिभिजनया लागाय् थौं ग्वसाः ग्वःगु समारोहय् नेपाल टेलिभिजनया अङ्ग्रेजी च्यानलया कथं ‘एनटिभी वल्र्ड’ शुभारम्भ यानादीगु खः। थ्व च्यानलं नेपाल अन्तरराष्ट्रिय जगतय् नेपाल म्हसिकेगु सामग्रीत न्ह्यब्वइगु जूगु दु। ज्याझ्वलय् राष्ट्रपति पौडेलं पिएसबीया लोगो व मोबाइल एप सार्वजनिक यानादिल।

नेपाल टेलिभिजन व रेडियो नेपालयात समायोजन यानाः रुपान्तरित पिएसबी नेपालं न्हापांगु वार्षिकोत्सव न्यायेकूगु खः । राष्ट्रपति पौडेलपाखें २०८१ असोज २२ गते विधेयक प्रमाणीकरण जूगु खः। ऐनया व्यवस्थाकथं प्रमाणीकरण जूगु ३१ क्वःगु दिं २०८१ कात्तिक २३ गतेनिसें उगु कानुन कार्यन्वयनय् वःगु खः।

थ्व ऐन कार्यान्वयनय् वयेनापं रेडियो प्रसार सेवा विकास (समिति) गठन आदेश, २०४१ अन्तर्गत नीस्वंगु रेडियो नेपाल व सञ्चार संस्थान ऐन, २०२८ अन्तर्गत नीस्वंगु नेपाल टेलिभिजन सार्वजनिक सेवा प्रसारण संस्थाय् रूपान्तरण जूगु खः।

Categorized in राष्ट्रिय