नेपाल ललितकला प्रज्ञा प्रतिष्ठानया मंकाः ज्या नापं जिन्जा ग्यालरी जापान व बिन्दु स्पेस फर आर्टिस्ट नेपालया मंकाः ग्वसालय् सांस्कृतिक कालबिल यायेगु तातुना म्हिगःनिसें येँय् अन्तरराष्ट्रिय कला प्रदर्शनी न्ह्याःगु दु।

‘बोडरलेस स्माइल फर स्माइल’ शीर्षकय् न्ह्याःगु प्रदर्शनीया नेपाल ललितकला प्रज्ञा प्रतिष्ठानया कुलपति नारदमणि हार्तम्छालीं उलेज्या यानादिल। चित्रकला प्रदर्शनी सांस्कृतिक कालबिल जुइगु छगू माध्यम जूगु व थुपिं कलापाखें थःगु ब्यागलं म्हसिका, तजिलजि पिब्वइगु व कलापाखें शान्ति व सौहार्दया सन्देश दइगु वय्कलं धयादिल।

प्रतिष्ठानया पूर्वकुलपति किरण मानन्धरं प्रष्तिठानं मित्रराष्ट्रनाप जानाः ग्वसाः ग्वइगु थुजाःगु कला प्रदर्शनीया ज्या तसकं च्वछायेबहः जूगु धयादिल। वय्कलं विज्ञान व प्रविधि थेँ हे कलानं न्ह्याः वनाच्वंगु बिचाः तयादिल। जिञ्जा ग्यालरी जापानया निर्देशक तामाकी कानों नेपालय् थुगु कथंया प्रदर्शनी यायेखनाः तसकं लय्ताःगु धयादिल। वय्कलं थुगुसीया प्रदर्शनीइ बालकलायात दुथ्याकाःगु धयादिल। प्रदर्शनीया क्युरेटर नापं बिन्दु स्पेस फर आर्टिस्टया निर्देशक पृथ्वी श्रेष्ठं प्रदर्शनीइ ब्वतिकयादीपिं सकलें कलाकार लिसें ग्वाहालिमियात सुभाय् देछानादिल।

प्रदर्शनीइ नेपाः, जापान, दक्षिण कोरिया, जर्मनीलिसें देय्या ७५गू कलाकृति दुथ्याकातःगु दु। गुकी नेपाःपाखें कुलपति नारदमणि हार्तम्छाली, उपकुलपति लालकाजी लामा, प्राज्ञपरिषद् दुजःपिं सौरगङ्गा दर्शनधारी, दिनेश्वर महतो, सञ्जय वान्तवा, अरुणा हिङमाङलिसें कलाकारपिं प्रदीप शाक्य, सुन्दर सिंख्वाल, एरिना ताम्राकार, पृथ्वी श्रेष्ठ, मनिषलाल श्रेष्ठ, आशा डङ्गोल, सम्झना राजभण्डारी, अनिल शाही, भाइराजा महर्जन, विनोद लिम्बू, विनोद प्रधान, दीपक आउजीया कलात दुथ्यानाच्वंगु दु। पर्यटन प्रवद्र्धनया निंतिं थ्व प्रदर्शनीं ग्वाहालि याइगु विश्वास यानातःगु दु । प्रदर्शनी थ्वहे कात्तिक २७ गतेतक न्ह्याइगु जूगु दु।

Categorized in राष्ट्रिय