नेपाल प्रहरीं जेनजी आन्दोलनया झ्वलय् कारागारपाखें बिस्युं वंपिं निम्ह कैदीबन्दीतय्त ज्वंगु दु। जिल्ला प्रहरी परिसर येँया पुचलं वंगु भदौ २४ गतेया जेनजी आन्दोलनया झ्वलय् केन्द्रीय कारागार सुन्धारां बिस्युं वंम्ह सुजन रसाइली व मकवानपुरया भीमफेदी कारागारपाखें बिस्युं वंम्ह विष्णुलाला थिङयात ज्वनाः म्हिगः सार्वजनिक याःगु खः।

परिसरया प्रवक्ता, प्रहरी उपरीक्षक पवनकुमार भट्टराईं ज्वनाम्ह रसाइली डाँका चोरी मुद्दाय् कैद भुक्तान याना च्वंम्ह व थिङं लागूवासः मुद्दाय् कैद भुक्तान यानाच्वंगु धयादिल। ज्वंम्ह रसाइली सिन्धुपाल्चोक बाह्रबिसे व थिङ मकवानपुरया बकैया गाउँपालिकाय् च्वनीम्ह खः।

प्रहरीं रसाइलीयात येँ महानगरपालिका–६ आरुबारी व थिङयात कागेश्वरी मनोहरा नगरपालिका–६ ग्रिनहिलसिटीपाखें ज्वंगु खः।

Categorized in अपराध