पोर्चुगलय् च्वंगु नेपाली दूतावासं नेपाः व मध्यपूर्वया थीथी देसय् च्वंपि नेपाःमियात कामदार भिसाया नामय् जुइगु ठगीपाखें बचे जुइत इनाप याःगु दु।

दूतावासं बुधबाः सनिलय् छगू विज्ञप्ति पिथनाः थ्वहे कात्तिक ६ गते (२३ अक्टोबर २०२५) निसें लागू जुइगु यानाः पोर्चुगल सरकारं उच्च दक्ष बाहेकं फुक्कं कथंया कामदार भिसा जारी यायेगु बन्द याःगु अवस्थाय् सावधानी छ्यलेत सकसितं इनाप याःगु दु।

नेपाः व मध्यपूर्वया थीथी देसय् च्वंपिं नेपाःमियात पोर्चुगलय् ज्याय् तयाबी धकाः ठगे यानाच्वंगु थःपिनिगु जानकारी वःगुलिं दूतावासं थुजाःगु गैरकानुनी गतिविधि मयायेत व थुकी मस्वायेत हाथ्या ब्यूगु दु।

थथे कामदार भिसा बन्द यायेधुंकूगु आःया अवस्थाय् उगु कथंया भिसा छ्यलाः छुं नं कथं थन वये मदइगु धासें पोर्चुगल वयेगु व छ्वयेगु नामय् जुइगु ठगीपाखें तापाक्क च्वना जुइत स्वापू दुपिं सकसितं दूतावासं इनाप याःगु दु।

Categorized in अपराध