येँ महानगरपालिकां कुमारी छेँया पौ जीर्णाेद्वार यायेत छगू क्वति नीन्यागू लख पीन्हय्द्वः च्यासः व खुइप्यतका लागत अनुमान याःगु दु। आर्थिक दँ २०८२÷८३ या भाः तयाः गणना याःबले आँय्पा, पःखाः, सिंलिसें पौ नापं स्वाःगु ज्वलंया जीर्णाेद्वार यायेत थ्व लागत वःगु येँमपां धाःगु दु।

कुमारी छेँया पौ ज्वइगु जुयाः थुकिया प्राविधिक पक्षया अध्ययन यायेत नीस्वंगु समितिं ब्यूगु प्रतिवेदनया कार्यान्वयन यायेत म्हिगः येँमपाया उपप्रमुख सुनिता डङ्गोलया नायःसुइ साझेदार ज्याकुथिया अधिकारीपिं नाप च्वंगु बैठकय् लागत अनुमानया विषय जानकारी ब्यूगु खः। कुमारी छेँ जीर्णाेद्वारया प्राविधिक, सामाजिक नापं मेमेगु पक्षया विषय सरोकारवालापाखें प्रतिक्रिया काये धुंकाः उपप्रमुख डङ्गोलं मौसम प्रतिकूलता जुइ न्ह्यः कुमारी छेँया पौ जीर्णाेद्वार यायेसिधयेके माःगु खँय् बः बिसें जीर्णाेद्वारया प्रक्रिया याकनं न्ह्याकेत हनुमानध्वाखा दरबार संरक्षण ज्याझ्वःयात निर्देशन बियादीगु खः।

बर्खाय् कुमारी छेँया पौ ज्वइगु जुयाः जीर्णाेद्वारया अध्ययन यायेत वंगु साउन २० गते समिति नीस्वंगु खः। समितिया कजीखय् पुरातत्व विभागया पुरातत्वविज्ञ पुरुषोत्तम डङ्गोल च्वनादीगु दु। दुजलय् विभागया इञ्जिनियर रोशन डङ्गोल, हनुमानध्वाखा हेरचाह अड्डाया प्रमुख काजीमान प्याकुरेल, गुठी संस्थानया इञ्जिनियर भीमप्रसाद अधिकारी व येँमपाया हनुमानध्वाखा दरबार संरक्षण ज्याझ्वःया आर्किटेक्ट अमित बज्राचार्य च्वनादीगु दु। अध्ययन समितिं ब्यूगु प्रतिवेदनया कथं कुमारी छेँया नामं म्हसिका दूगु कुमारीबहाःया स्वंगू तगिंया पःखाः चिरिबाना च्वंगु दु।

छुं थां व धलिं नं थाय् त्वतीगु अवस्था जूगु दु। गुलिखय् धलिं कीलं नयाः चिचीधंगु प्वाः दयेधुंकूगु दु। थाय् थासय् च्वंगु सिँ ध्वगिइगु अवस्थाय् दु। निगूगु तगिंमय् न्हाय्कनं तपुयातःगु अंगः किपात म्वाकातयेमाःगु अवस्थाय् दु। थां बाहेकं अप्वःधयाथें सिँया ज्वलंत अग्राखया मखुसें मेमेगु सिँया जूगुलिं याकनं जीर्णाेद्वार यायेमाःगु खनेदु। बैठकय् समितिया दुजः आर्किटेक्ट अमित बज्राचार्यं जानकारी बियादिल।

बज्राचार्यया कथं आँय्पा पौ प्यखेरं थाय्थासय् प्वला वने धुंकूगु दु । गुलिथासय् आँय्पा तःज्यानाः कुतुंवःगु, आइरन वेल्ट लिहांवःगु दु । गुलि थासय् ला आइरन बेल्ट हे मदु। अप्वः धयाथें संरचना स्यंगु अवस्थाय् थ्यने धुंकूगु दु।

Categorized in राष्ट्रिय