जनकपुरधामय् दँय् दसं झःझः धायेक न्यायेकीगु सीताराम विवाह पञ्चमी महामहोत्सवया तयारी लिपांगु चरणय् थ्यंगु दु। थनिंनिसें नगरदर्शन ज्याझ्वः नापं छवाः यंकंया धार्मिक पर्व औपचारिक कथं न्ह्यायेत्यंगु दु।

जानकी मन्दिर लागा, रङ्गभूमि ख्यः लिसें बाह्रबिघा लागाय् सुचुकुचुया नापनापं ल्वःवने पुइक पाल तयेगु ज्या तःगतिं न्ह्याना च्वंगु जानकी मन्दिर व्यवस्थापन पक्षं धाःगु दु। देगः जःखःया गल्ली, देगः देगः पतिकं मत जडान यायेगु ज्या जुयाच्वंगु दु। विवाह पञ्चमीया मू ज्याझ्वः जानकी मन्दिर व बाह्रबिघा रङ्गभूमि ख्यलय् हे केन्द्रित जुइगु जूगु दु, अथे खःसां थुगुसी छुं नं तगिंया सरकारं ग्वाहालि मयाःगु देगःया उत्तराधिकारी महन्थ रामरोशन दासं धयादिल।

न्हापाया दँय् सरकारी निकायं आर्थिक नापं व्यवस्थापकीय ग्वाहालि यायेगु याना च्वंगुलिइ थुगुसी धाःसा छुं नं कथंया ग्वाहालि मजूगु वय्कलं धयादिल। अयोध्या, ऋषिकेश, हरिद्वार लिसें भारतया थीथी धार्मिक केन्द्रपाखें थुगुसी नं तः ल्याखय् साधु–सन्त, महन्त, योगी, सन्यासी, भिक्षु व भिक्षुणीत वइगु जानकी मन्दिरं धाःगु दु।

जनकपुरधामयात मिथिलाञ्चलया सांस्कृतिक राजधानीया कथं म्हसिकीगु थ्व महोत्सव दँ दँनिसें नेपाः–भारत धार्मिक स्वापू क्वात्तुकीगु मू माध्यम जुयाः वयाच्वंगु दु। छवाः यंकंया विवाह पञ्चमी महामहोत्सवया थौं नगरदर्शन, शुक्रबाः फूलबारी लिला, ६ गते धनुषयज्ञ, ७ गते तीलकोत्सव, ८ गते मटकोर, ९ गते स्वयंवर नापं भिं इहिपाः व १० गते रामकलेवा विधिलिसें थुगुसीया महोत्सव क्वचाइगु जूगु दु।

दँय्दसं मङ्सिर शुक्लपक्ष पञ्चमीया दिं न्यायेकीगु थ्व पर्वय् नेपाः व भारतया थीथी थासं लखं लख भक्तजनत जनकपुरधाम वयेगु याइ। प्रमुख जिल्ला अधिकारी प्रेमप्रसाद लुइँटेलया कथं विवाह पञ्चमीयात ताःतया सुरक्षा योजना कडा यानातःगु दु। तः ल्याखय् वइगु लखंलख भक्तजनतय्त बिचाः यानाः नेपाल प्रहरी, सशस्त्र प्रहरी लिसें ट्राफिक प्रहरीयात माःगु ल्याखय् परिचालन यायेगु वय्कलं धयादिल।

Categorized in राष्ट्रिय