नेपाल कम्युनिष्ट पार्टी (एमाले), राष्ट्रिय स्वयंसेवक फोर्स (एनभिएफ) केन्द्रीय ‘कमाण्ड’ घोषणा जूगु दु।

एमाले जनसङ्गठन समन्वय संयन्त्रपाखें थौं थन ग्वसाः ग्वःगु ज्याझ्वलय् एमालेया नायः केपी शर्मा ओलीलिसें नेता व कार्यकर्तातय्गु उपस्थितिइ न्हय्गू हे प्रदेशया प्रतिनिधित्व दइ कथं ‘कमाण्ड’ घोषणा याःगु खः। पुष्पराज श्रेष्ठया कजिसुइ ११ म्ह दुजःया टोली दयेकूगु खः।

संयन्त्रया कजि भानुभक्त ढकालं फोर्सया केन्द्रीय सचिवालय व केन्द्रीय कमिटी दुजः तय्गु नां घोषणा याःगु खः।उगु टोलीइ सहसंयोजकलिसें केशव रोका, लव अधिकारी यादव, जयराम लामा, विदुर शर्मा, सागर भट्ट, सञ्जीव धिताल, विनिता काफ्ले च्वनादीगु खः। टोलीयात पार्टीया नायः ओलीं बधाई बियादिसें सपथ नं कायेकादिल। फोर्सय् पार्टीया थी थी जनसङ्गठनपाखें प्रतिनिधित्व जुइगु व उगु सङ्गठनपाखें भाला काये धुंकूपिं मनूतय्त दुथ्याकीगु नेता ढकालं कनादिल।

ज्याझ्वलय् एमालेया पोलिटब्युरो दुजः महेश बस्नेतं सामाजिक सुरक्षाया निंतिं फोर्सं ज्या याइगु धयादिल। वंगु असोज १५ गते ख्वपया गुण्डुइ उगु फोर्स घोषणा ज्याझ्वलय् केन्द्रीय टोली सार्वजनिक यायेगु धाःगु खः।

Categorized in राष्ट्रिय