नेपाल प्रहरीं मध्यवानेश्वरय् लुँ वहःया तिसालिसेंया सामान खुयायंकूम्हेसित ज्वंगु दु।

प्रहरी वृत्त बानेश्वरया प्रहरी टोलीं येँ महानगरपालिका–३१ मध्ये बानेश्वरया छखाः छेँया क्वथाय् ताःचाः स्यंकाः लुँया तिसालिसें सामान खुयायंकूम्ह सिन्धुपाल्चोक छेँ जूम्ह २० दँ दुम्ह सागर विश्वकर्मायात ज्वगुं खः। जिल्ला प्रहरी परिसर येँया प्रवक्ता, प्रहरी उपरीक्षक (एसपी) पवनकुमार भट्टराईं छेँया क्वथा स्यंकेत छ्यलीगु थी थी सामान व खुया यंकूगु सामानलिसें विश्वकर्मायात ज्वंगु जानकारी बियादिल।

ज्वंम्ह विश्वकर्मायाके प्रहरीं छगू थान खुकुरी, लुँया अंगू छपाः, लुँया छपाः चुरी, लुँया झुम्का छज्वः, मोतीया माला छमाः, लुँया पाउजु छज्वः, वहःया ध्यबा छगः लुइकूगु खः।थथेहे, विदेशी मुद्राया ध्यबा २२ गः, नँया रेन्ची निगू, सोनी कम्पनीया क्यामेरा निगः, क्यामेराया चार्जर निगू, भिडियो प्लेयर छगः, मेमोरी कार्ड छगू, लुँवहःया विल २७ गू थान लुइकूगु प्रवक्ता भट्टराईं धयादिल।

ज्वंम्ह विश्वकर्मायात प्रहरीं जिल्ला अदालत येँपाखें न्यान्हुया म्याद थपे यानाः अनुसन्धान यानाच्वंगु परिसरं धाःगु खः।

Categorized in अपराध