संकिपाकःमि तय्स चलचित्र विकास बोर्डयात स्वतन्त्र व स्वायक्त दयेकेमाःगु खँय् बः बिउगु दु। राष्ट्रियसभाया विधायन व्यवस्थापन समितिया थौं थन च्वंगु बैठकय् वय्कःपिंसं लिपांगु ई संकिपा मनोरञ्जनया नाप नापं उद्योगया कथं स्थापित जूगुलिं राज्यं वहे कथं प्राथमिकताय् तयेमाःगु बिचाः तयादीगु खः।

संकिपा निर्देशक केपी पाठक, प्याखंम्वःलिसें निर्माता खगेन्द्र लामिछाने, चलचित्र पत्रकार सङ्घया केन्द्रीय नायः समिर बलामीपिन्स नेपाली संकिपायात मेमेगु देय् नाप सम्झौता यायेगु नीति नालाकायेमाःगु बिचाः तयादिल। नेपाःया संकिपा जाँचबुझ समिति (सेन्सर बोर्ड) यातूगु व अःपूगु जुइमाःगु खँय् वय्कःपिंसं माग यानादिल।

पत्रकार बलामीया कथं लिपांगु ई संकिपालं राज्ययात बिइगु राजस्व अप्वयावंगु धयादिसें संकिपाया ख्यलय् राज्यया लगानी मगाःगु धकाः बिचाः तयादिल । निर्माता सङ्घया महासचिव नापं जुया च्वनादीम्ह प्याखंम्वः लामिछानें मेमेगु देसय् व्यवसायया निंतिं सम्भौता जुइगु दसि बियादिसें नेपलाय् अज्याःगु कुतः जुइमाःगु खँय् बः बियादिल। चलचित्र नेपाल कलाकार सङ्घया मोहन निरौलां चलचित्र विकास बोर्ड स्वायक्त कथं सञ्चालन जुइमाःगु धयादिल। सहलह लिपा संकिपालिसे स्वापू दूगु गुंगू संस्था दयेकूगु प्रतिवेदन सभापति तुलसाकुमारी दाहालयात लःल्हाःगु दु।

सभापति दाहालं थौं लःल्हाःगु प्रतिवेदनय् माःगु संशोधन यानाः न्हय्न्हुया दुने लिपांगु प्रतिवेदन लःल्हायेत इनाप यानादिल। वय्कलं विधान समितिइ मङ्सिर ९ गते निसें संकिपा विधेयकय् दफाबार सहलह जुइगु धयादिल। उकिया लिपा राष्ट्रियसभाय् विधेयक सहलह जुइगु धयादिल।वय्कलं थुकिया दथुइ सरोकार दुपिं नाप छ्याता कयाः संकिपाया हकअधिकार सम्बन्धी विधेयक दयेकेत समितिं बः ब्यूगु नं धयादिल।

Categorized in मनोरन्जन