नेपाल प्रहरीं सर्वाेच्च अदालत तोडफोड व मि तःपिं निम्हेसित ज्वंगु दु।जिल्ला प्रहरी परिसर येँया पुचलं सर्वाेच्च अदालत तोडफोड, मि तयेगु व सुरक्षाकःमिया ल्वाभः लुटपाट याःगु द्वपनय् झापाया भद्रपुरया २८ दँ दुम्ह ज्योति थापा घताने व यलया महालक्ष्मीस्थानया ३० दँ दुम्ह सुशील श्रेष्ठयात ज्वनाः म्हिगः सार्वजनिक याःगु दु।

परिसरया प्रवक्ता लिसें प्रहरी उपरीक्षक (एसपी) पवनकुमार भट्टराईं वंगु भदौ २४ गते जेनजी आन्दोलनया झ्वलय् सर्वाेच्च अदालतया भवनय् तोडफोड, मि तयेगु नापं लुटपाट यायेगु, सुरक्षाकःमिया ल्वाभः लुटपाट नापं प्रदर्शन यायेगु, आपराधिक ज्याय् स्वाःगु द्वपनय् उमित ज्वनाःगु धकाः धयादीगु दु।

ज्वंपिंत जिल्ला अदालत येँपाखें आपराधिक उपद्रव याये मज्यूगु द्वपनय् न्हय्न्हुया म्याद थप यानाः अनुसन्धान जुया च्वंगु प्रवक्ता भट्टराईं धयादिल।

Categorized in अपराध