जिल्ला प्रशासन ज्याकुथि, येँय् दर्ता जूगु सङ्घसंस्थाया पदाधिकारीपिंसं आर्थिक नापं प्रशासनितक अनियमितता याःगु ध्याचू अप्वःया वःगुलिं छानबिन न्ह्याकूगु दु।

येँया सहायक प्रमुख जिल्ला अधिकारी लिसें प्रवक्ता खिमराज भूसालं अनियमिताया ध्याचू अप्वःया वःगुलिं छानबिन न्ह्याकागु धयादिल। वय्कःया कथं आः येँय् दर्ता जूगु छुं सङ्घ संस्थाय् विधान अःखःया गतिविधि जुइगु, ज्यासना पुचलं मतिवःवः कथं ज्या याइगु, आर्थिक अनियमितता याइगु लिसेंया विषय तःक्वः हे ध्याचू वःगु दु।

उगु ध्याचू नापं उजुरीया सम्बोधत यायेत समिति हे दयेकाः छानबिन न्ह्याकूगु दु।प्रवक्ता भूसालं ध्याचू सम्बन्धय् छानबिन यानाः प्रतिवेदन न्ह्यब्वयेत जिल्ला प्रशासन ज्याकुथिया प्रशासकीय अधिकृतया संयोजकत्वय् स्वम्ह दुजः दूगु समिति नीस्वंगु दु व समितिं ज्या न्ह्याके धुंकूगु धयादिल।

Categorized in राष्ट्रिय