पुरातत्व विभागं कुमारी छेँपाखें थ्यंमथ्यं नीन्यादँ न्ह्यः खुयायंकूगु पुरातात्विक तोरण बेलायतं नेपाः लितहःगु दु। विभागं स्वदेशी व विदेशी सम्पदा अभियन्तातय् नाप समन्वय यानाः उगु तोरण लित हःगु खः।

मल्लकालीन इलय् निर्माण जूगु उगु सम्पदा विसं २०५७ लय् कुमारी छेँ नं खुया यंकूगु खः। बेलायतया सङ्ग्रहालय लुइ धुंकाः नेपाल सरकार, थीथी सङ्घसंस्था व विद्वान्पिनिगु मंकाः ज्याय् नेपाः लित हयाः हाकनं वहे थासय् प्रतिस्थापन याःगु खः। प्रतिस्थापन न्ह्यः राष्ट्रिय सङ्ग्रहालय तयातःगु खः।

अन्तरराष्ट्रिय कानुन कथं छुं नं देय्या सम्पदा हलिंया मेगु देसय् दुसा माःगु कानुनी प्रकृया पूवंकाः सम्बन्धित देय्यात लित बिइमाःगु प्रावधानया कथं थ्व सम्पदा हयागु धकाः पुरातत्व विभागया अधिकृत सरिता सुवेदीं धयादिल। वय्कःया कथं नेपालं खुयाः यंकूगु थीथी मूर्तित, कलावस्तु, सम्पदा हलिंया छुं नं देसय् दूगु धइगु सुचं वःसा लित हयेगु निंतिं प्रकृया न्ह्याकेगु यानाच्वंगु दु।

थीथी देय्या सङ्ग्रहालय, लिलामी छेँ व निजी सङ्ग्रहालाय थ्यंगु सम्पदा लित हयेबले सम्बन्धित देसं ढुवानी खर्च फयाकाइगु व्यवस्था दु। अन्तरराष्ट्रिय तगिंमय् च्वनाच्वंपिं नेपाली समुदाय, सम्पदा क्षेत्रय् क्रियाशिल सङ्घसंस्थातय् नापंया ग्वाहालि यानाः वयाच्वंगु दु।स्वनिगलय् मध्यकालीन इलय् निर्माण जूगु काष्ठकला, मूतिकला, प्रस्तरकला, वास्तुकलाया नमूना विशेष यानाः थीथी देगलय् छायेपिया तःगु दु।

थुकिं तत्कालीन समाजया कला शैली निर्माणया अवस्था अध्ययनय् ग्वाहालि जुइगु यानाच्वंगु दु। कला क्षेत्रया विकासय् गर्व यायेबहःगु इतिहास क्वबिना च्वंगु सम्पदा संरक्षणं मुक्कं राष्ट्रया गौरब तब्याकूगु अधिकृत सुवेदीं धयादिल।

Categorized in राष्ट्रिय