येँया ह्यात होटलया दुने च्वंगु क्यासिनोय् दुहां वनाः ध्यबाः खुइगु, मि तयेगु व तोडफोड याःपिंमध्ये निम्हेसित प्रहरीं ज्वंगु दु।

वंगु भदौ २३ व २४ गते जेनजी आन्दोलनया झ्वलय् येँ महानगरपालिका–६ खास्ति (बौद्ध)या ह्यात होटल दुने च्वंगु क्यासिनोय् दुहां वनाः ज्वःगु ल्वाभः क्यनाः क्यासिनोया काउन्टरय् तयातःगु ध्यबाः खुयाः तोडफोड याःपिं निम्हेसित जिल्ला प्रहरी परिसर येँया पुचलं म्हिगः ज्वंगु खः।

येँ मपा–६ खास्तिया ४२ दँ दुम्ह दावा शेर्पा व बूढानिलकण्ठ नगरपालिका–१२ या २९ दँ दुम्ह रन्जित खड्गीयात ज्वंगु प्रहरीं धाःगु दु। क्यासिनो दुने च्वंगु ध्यबाः खुइगु नापं संरचना तोडफोड व मि तयाः बिस्युं वंपिं उमित भुइजःसि लागां ज्वनाःगु धकाः परिसरया प्रवक्ता, प्रहरी उपरीक्षक (एसपी) पवनकुमार भट्टराईं धयादिल।

ज्वंपिं निम्हेसितं चोरी नापं डाँका सम्बन्धी द्वपनय् व आपराधिक उपद्रव याये मज्यूगु द्वपनय् जिल्ला अदालत येँपाखें न्हय् न्हुया म्याद थपे यानाः अनुसन्धान न्ह्याकाःगु धकाः प्रवक्ता भट्टराईं धयादिल।

Categorized in अपराध