नांजाम्ह गायक लिसे संगीतकार द्वारिकालाल श्रेष्ठ व नांजाम्ह कलाकार नगिना जोशीया म्ह्याय् भिन्तुना जोशी व वय्कःया दाजु शरद जोशीं हालातःगु युगल म्ये ‘भारा भारा मिन मन’ वंगु शनिवाः छगू ज्याझ्वः दथुइ पितब्वज्या याःगु दु।

नेपालभाषाया सांगितिक ख्यलय् थथे दाजु व केंहे जाना म्ये हाःगु थ्व न्हापांखुसी खः। थुगु म्येया भिडियोया निर्देशन विश्वास जज्राचार्यं यानादीगु खः। प्याखँ म्वः कथं भिन्तुना जोशी लिसे मनोज महर्जनं म्हिता तःगु दु। ज्याझ्वलय् नेवाः म्येया नापं शरद जोशीं हालादीगु खस् नेपाली भायया स्वपु म्येया भिडियो नं पितब्वज्या जूगु खः।

‘के भयो आमा’, ‘कुराहरू’, ‘तिमिलाई दिएको आँसु’ पितब्वज्या जूगु खः। स्वपु मध्ये तिमिलाई दिएको आँसु या भिडियोया निर्देशन शिवानी वज्राचार्यं यानादीगु खः। थुके भिन्तुना जोशी लिसे सोहित मानन्धरया लिसें नेहा मालाकारया अभिनय स्वयेदइ। पितब्वज्या ज्याझ्वलय् ख्यालिजुजु मदनकृष्ण श्रेष्ठ व नेवाः देय् दबुया नायः पवित्र वज्राचार्यं मंकाः कथं त्वाः देवाय् मतच्याका उलेज्या यानादीगु खः।

सभानायः नगिना जोशीं लसकुस यानाः न्ह्याःगु ज्याझ्वलय् भिन्तुना जोशीं सुभाय् देछाना दीगु खः। ज्याझ्वलय् म्युजिक भिडियोया निर्देशकपिं विश्वास वज्राचार्य व शिवानी वज्राचार्य लिसे विशिष्ट पाहांपिं वरिष्ठ नृत्य निर्देशक बसन्त श्रेष्ठ, संगीतकार मनराजा नकःमि, वरिष्ठ गायक जुजुकाजि रन्जित व अग्रज सिने पत्रकार विजयरत्न असंबरे नं नुगःखँ तयादीगु खः।

Categorized in मनोरन्जन