नेकपा (एमाले)या ११क्वःगु राष्ट्रिय महाधिवेशनया निंतिं निगू जिल्लाबाहेक फुक्कय् नं प्रतिनिधि छनोट पूवंगु दु। महाधिवेशन प्रतिनिधि व्यवस्थापन समितिया छ्याञ्जे माधव ढुङ्गेलया कथं ओखलढुङ्गा व धनकुटा बाहेक फुक्क भूगोल, गैरभूगोलया प्रतिनिधि छनोट पूवंगु खः।

वय्कलं उगु निगू जिल्लाय् नं प्यन्हु दुने प्रतिनिधि निर्वाचन यानाः पूवंकेत निर्देशन ब्यूगु जानकारी बियादिल। छुं छुं जिल्लाय् प्रतिनिधि छनोट विधि कथं मजूगुलिं छानबिन जुयाच्वंगु वय्कलं कनादिल। छ्याञ्जे ढुङ्गेलं फुक्क जिल्लां छनोट जूपिं प्रतिनिधितय्गु प्रदेश कमिटीया ज्याकुथिइ विवरण सङ्कलन जुयाच्वंगु जानकारी बियादिल।

“प्रतिनिधिया विवरण प्रदेश कमिटीइ महाधिवेशन शुल्कलिसें सङ्कलन जुयाच्वंगु दु”, वय्कलं धयादिल, “छन्हु निन्हुं फुक्क प्रतिनिधितय्गु विवरण केन्द्रीय ज्याकुथिइ वइ व जिमिसं उपिं प्रतिनिधि कार्ड दयेकाः वितरण यायेगु जुइ।” महाधिवेशनय् थ्यंमथ्यं निद्वः व २०० प्रतिनिधिं ब्वति काइ।

महाधिवेशनय् ब्वति काइपिं ग्वसाःखलःतय्त स्वद्वः व प्रतिनिधियात निद्वः शुल्क क्वःछ्यूगु खः। एमाले महाधिवेशन थ्व हे मङ्सिर २७ निसें २९ गतेतक जुइत्यंगु खः।

Categorized in राजनीति