नेपाल कम्युनिष्ट पार्टी (एमाले)या न्ह्यःने वयाच्वंगु ११ क्वःगु राष्ट्रिय महाधिवेशनया तयारी तःगतिं न्ह्याकूगु दु।  महाधिवेशन व्यवस्थापन तयारीया विषय थौं उगु पार्टीया केन्द्रीय ज्याकुथि, च्यासलय् महासचिव शङ्कर पोखरेललिसेंया नेता दथुइ सहलह जूगु खः।

सहलहय् उपमहासचिवपिं प्रदीप ज्ञवाली, पृथ्वीसुब्बा गुरुङ, विष्णु रिमाल, सचिवपि, क्वःछिनातःपिं सङ्गठन विभागया प्रमुखलिसें विभागीय प्रमुख, स्थायी कमिटीया दुजः, पोलिटब्युरो दुजः नापं व्यवस्थापन समिति सचिवालय च्वंपिं मेपिं नेतापिनिगु ब्वति दूगु खः। महाधिवेशनया निंतिं जिल्ला व प्रवासतपाखें वःगु प्रतिनिधितय् धलःयात केन्द्रीय सङ्गठन विभागं अन्तिम रूप बिइगु ज्या यानाच्वंगु बैठकय् जानकारी ब्यूगु खः।

वंगु मङ्सिर १३ गते फुक्क मातहतया कमिटी व जनसङ्गठनय् खनेदूगु विवाद ज्यनेधुंकाः प्रतिनिधि धलः पूर्णरूपं छन्हु निन्हुं हे क्वःजीगु धाःगु खः। ओखलढुङ्गा व धनकुटाया विवाद बाहेक मेपिनिगु महाधिवेशन प्रतिनिधितय् धलः तयार जुइ धुंकूगु दु। बैठकलिपा उपमहासचिव ज्ञवालीं महाधिवेशनया फुक्क तयारी उत्साहजनक रूपं न्ह्याना च्वंगु जानकारी बियादिल।

महाधिवेशनय् थ्यं मथ्यं नीप्यसः स्वयां अप्वः प्रतिनिधितय्सं ब्वति काइगु न्हापांगु अनुमान यानातःगु खः। देयन्यंकंया प्रदेश, जिल्ला, जनसंगठन नापं मोर्चा संगठनतपाखें चयन जूपिं प्रतिनिधितय्सं नेतृत्वसम्बन्धी महत्त्वपूर्ण निर्णय ब्वति काइगु जुइ। महाधिवेशन थ्व हे मङ्सिर २७ गते ख्वपया सल्लाघारीइ जुइगु ज्याझ्वः दु।

Categorized in राजनीति