नेपाल कम्युनिष्ट पार्टी (एमालें) न्ह्यःने वयाच्वंगु ११ क्वःगु राष्ट्रिय महाधिवेशनय् नेतृत्व ल्ययेत विद्युतीय भोटिङ मेसिन छ्यलीगु जूगु दु।

एमाले उपमहासचिव प्रदीप ज्ञवालीं नेतृत्व ल्ययेगु प्रक्रिया याकनं न्ह्याकेत थुगुसी नं विद्युतीय भोटिङ मेसिन छ्यलेगु धयादिल। एमालें थ्वस्वयांन्ह्यः चितवनय् क्वचाःगु १० क्वःगु राष्ट्रिय महाधिवेशनय् नं विद्युतीय भोटिङ मेसिन छ्यःगु खः।“जिमिसं नेतृत्व ल्ययेत विद्युतीय भोटिङ मेसिन छ्यलेगु निर्णय यानागु खः” वय्कलं धयादिल, “टेण्डर आव्हान जुइ धुंकूगु दु।

याकनं हे गुगु कम्पनीं याइगु धइगु निर्णय जुइ।”महाधिवेशनं थुगुसी एमालेय् १५ म्ह पदाधिकारी नापं २५१ म्ह केन्द्रीय कमिटी ल्यइ। वंगु भदौय् पूवंगु निक्वःगु विधान महाधिवेशनं पारित विधान संशोधन प्रस्तावं केन्द्रीय कमिटीइ ल्याः पाः याःगु खः।

एमाले महाधिवेशनय् थ्यंमथ्यं निद्वः व २०० म्ह प्रतिनिधितय्सं ब्वति काइ।एमाले महाधिवेशन थ्व हे मङ्सिर २७ निसें २९ गते तक येँय् जुइ त्यंगु खः। महाधिवेशनया बन्द सत्र धाःसा भृकुटीमण्डपय् जुइ धाःगु खः।

Categorized in राजनीति