बलिउड अभिनेत्री सन्नी लियोनीं चितवन हात्ती महोत्सवय् जुइगु क्रुरतायात क्वचाकेत इनाप याःगु दु। पशु हितया ख्यलय् ज्या याइगु संस्था पेटा एसियापाखे लियोनीं थज्याःगु कृतः क्वचायेमाः धकाः धाःगु खः।

पेटा एसियानाप ताःई तक ज्या यानाच्वम्ह अभिनेत्रीं धाःगु दु, ‘चितवन हात्ती महोत्सव ज्या जूगुलि लय्ताय् माःगु छुं कारण मदु । छाय् धाःसा थुकिया निंतिं किसीयात दायां यक्को कसाः बिइगु याइ ।’ थज्याःगु ज्याझ्व दिकेत अभिनेत्री लियोनीं इनाप याःगु खः ।

‘नेपालय् थज्यागु ज्याझ्वलं दर्शकतय्त मनोरञ्जन बिइगु उद्देश्यं किसीयात अस्वभाविक क्रियाकलाप यायेत बाध्यं यायेगु कुतःयात क्वचायैकेमाः ।’ लियोनीया उगु धापूयात पेटा एसिया नं थःगु सामाजिक सञ्जालपाखे सेयर याःगु दु।

‘बलिउड स्टार सन्नी लियोनीं चितवन हात्ती महोत्सवय् जुइगु क्रुरताया अन्त्य यायेत इनाप याःगु दुसा थज्याःगु ज्याझ्वः दक्व मिले जूयाः चितवन हात्ती महोत्सवयात करुणा, शिक्षा व विस्मयया उत्सवय् हिलेनु’ पेटा एसियां च्वंगु दु।

Categorized in मनोरन्जन