वंगु भदौ २३ व २४ गते जुगु जेनजी आन्दोलनया झ्वलय् करिब ८४ अर्ब ४५ करोड ७७ लाख तका बराबर याःगु भौतिक संरचना क्षति जुुगु तथ्याँक सार्वजनिक जूगु दु।

क्षतिग्रस्त सरकारी संरचना पुनर्निर्माणया निति ३६ अर्ब ३० करोड तका तुइगु अनुमान याःगु खः। क्षतिया मूल्याङ्कन नाप सार्वजनिक संरचनाया पुनःनिर्माण योजना तयार यायेत गठन जूगु समितिं म्हिगः प्रधानमन्त्री सुशीला कार्कीयात लःल्हागु प्रतिवेदनय् भौतिक संरचना अन्तर्गत २ हजार १ सय ६८ सङ्घसंस्था व निकाय प्रभावित जूगु उल्लेख याःगु खः।

आन्दोलनया झ्वलय् न्ह्यय्गू हे प्रदेशय् ५४ गु जिल्ला व २ सय ६२ पालिकाय् क्षति जूगु खः। प्रतिवेदनय् १२ हजार ६ सय ५९ गाडी क्षति जुगुलि १२ अर्ब ९३ लाख ६१ हजार तका बराबरया नोक्सान जुगुलि सरकारी व सार्वजनिक क्षेत्रय् ४४ अर्ब ९३ करोड ७३ लाख रुपैयाँ बराबरया क्षति जुगु खः।

अथेहे, २ हजार ६ सय ७१ भवन क्षति जुगु खःसा उकिया मूल्याङ्कन ३९ अर्ब ३१ करोड ७५ लाख तका बराबर थ्यःगु खः। प्रतिवेदन कथं सामुदायिक व मेमेगु क्षेत्रय् ५ अर्ब ९७ करोड १७ लाख तका बराबरया क्षति जूगु खः।निजी क्षेत्रया क्षति मूल्याङ्कन ३३ अर्ब ५४ करोड ८७ लाख तका बराबर व सरकारी क्षतिइ स्वंगू तहमध्ये सङ्घीय सरकारा ६८ प्रतिशत, प्रदेशया १० व पालिकाया २२ प्रतिशत जुगु दु।

उगु प्रतिवेदन कथं आन्दोलनया कारण २ हजार ९ सय ९९ म्हेसियागु रोजगारी प्रभावित जुगु दु। नापं, १३ अर्ब ८४ करोड ५६ लाख तका बराबर वस्तु व सेवा उत्पादन प्रभावित जुगु दु।

Categorized in राष्ट्रिय