प्रधानमन्त्री सुशीला कार्कीं संविधानं सुनिश्चित यानातःगु समावेशीकरण, सामाजिक न्याय व सांस्कृतिक–भाषिक विविधताया संरक्षण लिसें प्रवद्र्धन यायेगु राज्यया दायित्व जूगु धयादीगु दु।

आदिवासी जनजाति उत्थान राष्ट्रिय प्रतिष्ठानया २६ क्वःगु सञ्चालक परिषद् बैठकया थौं उलेज्या यानादिसें वय्कलं आदिवासी जनजातिपिनिगु म्हसिका, अधिकार, संस्कृति व समग्र विकासया निंतिं प्रतिष्ठानं यानाः वयाच्वंगु योगदान च्वछायेबहः जूगु धयादीगु दु। वय्कलं परिषदया बैठकपाखें याइगु निर्णय, मार्गदर्शन नापं नीतिगत छ्यातात राष्ट्रिय नीतितयेगु प्रभावकारी कार्यान्वयनय् सान्दर्भिक जुइगु विश्वास प्वंकादिल।

प्रधानमन्त्री कार्कीं संस्थागत सुदृढीकरण, ज्याझ्वःया प्रभावकारिता, अनुसन्धानय् लिधना च्वंगु नीतिया सिफारिस, मातृभाषा नापं तजिलजिया अभिलेखीकरण व संरक्षणया नापनापं आदिवासी जनजाति पिनिगु दिगो सामाजिक–आर्थिक सशक्तीकरणया निंतिं परिषद् बैठकं सुथांलाक लँपू क्वःछिइगु अपेक्षा यानादिल।

वय्कलं सरकारं प्रतिष्ठानया ज्याझ्वः लिसें गतिविधित प्रभावकारी कथं कार्यान्वयन यायेत माःगु नीतिगत, संरचनात्मक सुधार लिसें बजेट उपलब्ध यानाः वयाच्वनागु धयादिल। प्रधानमन्त्री कार्कीं विकास साझेदार, नागरिक समाज, स्थानीय सरकार व समुदाय दथुया मंकाः ज्यायात अझं बल्लाकाः समावेशी विकासया आज्जु ताःलाकेमाःगुलिइ बः बिसें उकिया निंतिं सरकार माःगु सहजीकरण यायेत तयार दूगु धयादिल। संविधानं नाला कयातःगु गणतन्त्र, सङ्घीयता, धर्मनिरपेक्षता व समावेशीकरणया मान्यतायात सकलें जातजाति लिसें समुदायया सर्वोपरि हितया निंतिं कार्यान्वयनय् यंकेगु सरकार व आमनागरिक निम्हेसिया दायित्व जूगु वय्कःया धापू दु।

तःताजियात राष्ट्रिय छवाःखय् रूपान्तरण यायेत लिसें आदिवासी जनजातिया सांस्कृतिक हक सुनिश्चित यायेत संविधानं प्रत्याभूत यानातःगु व्यवस्थात कार्यान्वयन यायेमाःगु वय्कलं धयादिल।अन्तरराष्ट्रिय श्रम सङ्गठन (आइएलओ)–१६९ व आदिवासी जनजातिसम्बन्धी संयुक्त राष्ट्रसङ्घीय घोषणापत्रया कथं कानुन संशोधन यायेत सर्वोच्च अदालतं ब्यूगु निर्देशनात्मक आदेशया सम्मान यासें ई कथं नियम कानुन परिमार्जनया निंतिं कार्ययोजना निर्माण यानाः कार्यान्वयनय् यंकेत सरकार प्रतिबद्ध दूगु प्रधानमन्त्री कार्कीं ध्वाथुइकादिल।

आदिवासी जनजाति आयोग व थारू आयोग थें जाःगु संवैधानिक आयोगतय्गु गठनं हक अधिकार संरक्षणय् ग्वाहालि जूगु न्ह्यथनादिसें वय्कलं आयोग व प्रतिष्ठान दथुइ थःथवंय् मंकाः ज्या व समन्वयया लिधंसाय् मंकाः आज्जु ताःलाकेमाःगु खँ कुलादिल।वंगु भदौ २३ व २४ गते जूगु जेनजी आन्दोलनं ल्ह्वंगु सुशासन, समृद्धि, नातावाद, क्रिपावाद व पक्षपातया अन्त्यसम्बन्धी मागत समावेशी विकास व सामाजिक न्यायया आकांक्षाया अभिव्यक्ति जूगु प्रधानमन्त्री कार्कीया धापू दु। सकलें वर्ग व समुदायया समान पहुँच व सहभागिताय् जूगु विकास जक दिगो जुइगु व थुकिं राष्ट्रयात बल्लाकीगु वय्कलं धयादिल।

Categorized in राष्ट्रिय