प्रधानमन्त्री सुशीला कार्कीयान्ह्यःने राष्ट्रिय योजना आयोगया नवनियुक्त उपाध्यक्ष डा. प्रकाशकुमार श्रेष्ठ व दुजः प्रा. सुनीति श्रेष्ठ (हाडां) पद व गोपनीयताया शपथ काःगु दु।

थौं थन ग्वसाः ग्वःगु छगू ज्याझ्वलय् उपाध्यक्ष श्रेष्ठ व दुजः प्रा. श्रेष्ठं प्रधानमन्त्री कार्कीया न्ह्यःने शपथ कयादिल। ज्याझ्वलय् आयोगया दुजः लिसें मूछ्याञ्जे सुमनराज अर्याल, प्रधानमन्त्री ज्याकुथिया सचिव राजकुमार श्रेष्ठ, आयोगया छ्याञ्जे रविलाल पन्थलिसें सरकारी उच्च अधिकारीतय्सं ब्वति काःगु खः।

शपथ काये धुंकाः प्रधानमन्त्री कार्कीं नवनियुक्त न्वकू व दुजःतय्त बधाई ज्ञापन बिसें सफल कार्यकालया भिंतुना बियादिल। वय्कलं देय्या अवस्थायात बांलाक अध्ययन यानाः व जेनजी युवातय् आकाङ्क्षा कथं योजनाया तयारी यायेत निर्देशन बियादिल।“जिमिसं छिकिपिंत विज्ञकथं थ्व भाला बियागु खः, देय्या परिस्थितिबारे थु हे जुइ, थ्व परिस्थिति थुइकाः झीसं पलाः न्ह्याकेमाः।

देय्या योजना व ज्याझ्वःत नं ह्यूपाःया निंतिं युवां याःगु आन्दोलनया भावना कथं तर्जुमा यायेमाः”, प्रधानमन्त्री कार्कीं धयादिल, “आःया परिस्थिति बांलाक अध्ययन यानाः देय्या नां तयेगु ल्याखं ज्या यायेमाः। जिं आशा याना, छिकिपिं थ्व ज्याय् सफल जुयादी।”सोमबाः मन्त्रिपरिषद् बैठकं आयोगया न्वकू व दुजः नियुक्त याःगु खः।

Categorized in राष्ट्रिय