नेपाल कम्युनिष्ट पार्टी (एमाले)या नवनिर्वाचित छ्याञ्जे शेरधन राईं वइगु फागुन २१ गते प्रतिनिधिसभाया निर्वाचन जुल धाःसा एमालें ब्वति काइगु धयादीगु दु।

थौं विराटनगर विमानस्थलय् सञ्चारकःमितयलिसे खँल्हाबल्हा यानादिसें वय्कलं सरकारं क्वःछिनातःगु इलय् चुनाव जुल धाःसा एमालें ब्वति काइगु तर आःतक चुनावया वातावरण सरकारं मदयेकूनिगु वय्कलं द्वपं बियादिल। कोशी प्रदेशया न्हापांम्ह मुख्यमन्त्री तकं जुयादीम्ह राईं प्रदेश सरकार याकनं पुनर्गठन जुइगु नं धयादिल।

वय्कलं थ्वस्वयांन्ह्यः हे पुनर्गठनया तयारी जूसां नं महाधिवेशनलिसें यानाः लिबाःगुलिं आः याकनं मन्त्रिपरिषद् हिलाबुला जुइ धकाः जानकारी बियादिल।वय्कलं प्रदेश सरकार पुनर्गठनया निंतिं सत्ता साझेदार दल नेपाली कांग्रेसलिसे छन्हु निन्हुं सहलह जुइ धयादिल।

Categorized in राष्ट्रिय