अग्रज पत्रकार रामकृष्ण कर्माचार्य
लहनान्युज | पोहेलाथ्व दशमी ११४६, पुस १५ मंगलवाः
अग्रज पत्रकार हनेवहःम्ह रामकृष्ण कर्माचार्यजु नेपाली पत्रकारिता ख्यलय् नगू थें थिनाच्वंम्ह ब्यक्तित्वया रुपय् प्रतिस्थापित ब्यक्तित्व खः। गुम्हेसिनं नेपालय् प्रेस स्वतन्त्रताया हक अधिकार स्थापित यायेत व पत्रकारिता ख्यःया विकासय् अनवरत रुपं थःत पानाच्वंगु दु।
थौंं स्वयां च्य्स्वदँ न्ह्यः यलय् जन्म जुयादिम्ह कर्माचार्यजुं नेपालय् प्रेस स्वतन्त्रताया हक अधिकार स्थापित यायेत व पत्रकारिता ख्यःया बिकास यायेत थःगु पूर्ण रुपं पानादिल । उगु ई गुगु इलय् समाजया रुपान्तरण व विकासया निंतिं जनतायात पत्रकारिता माध्यमं सुसूचित यायेगु ज्या अपूगु ज्या मखु।
उगु ई अथे धयागु राणा शासनया ई बि.सं. २०१८ सालंनिसे पत्रकारिता ख्यलय् सक्रिय जुयाः थःगु जीवनयात पत्रकारिताया पर्यायवाची कथ स्थापित यानादिल । नेपालय् पत्रकारिता बिषय ब्वनेगु मदुगु इलय् तत्कालिन सोभियत संघपाखे पत्रकारिता बिषय कयाः डिप्लोमा इन जर्नालिज्म यानादिल । नेपालय् पत्रकारिताया अग्रज रमेशनाथ पाण्डे, स्वर्गीय गोपालदास श्रेष्ठपाखे प्रेरित जुयाः वय्कलं ‘नयाँ सन्देश’ नांया पत्रिकाय् सहसम्पादक जुयाः ज्या यानादिल।
वयां लिपा थःगु हे प्रकाशन व सम्पादनय् २०२६ सालय् ‘गोरेटो साप्ताहिक’ पिथनादिल । गुगु पत्रिका पञ्चायतकालीन निर्देशन पालना मयागु हुनिं प्रकाशन बन्द यायेमाल । वयां लिपा वय्कः ‘अस्तित्व साप्ताहिक’ पाखे पत्रकारिता ख्यलय् सक्रिय जुयादिल । थ्वहे झ्वलय् सत्यनारायण बहादुर श्रेष्ठं पत्रकार संगठित यायेत नीस्वंगु नेपाल पत्रकार संघय् दुजः कथं च्वनाः ज्यासनादिल। थुगु हे संघय् च्वनाः ज्या यायेगु झ्वलय् अन्तर्राष्ट्रिय पत्रकार महासघय् तकं तःक्वमछि हे प्रतिनिधित्व यायेगु ह्वःताः चूलात । लिपा वय्कलं राष्ट्रिय प्रेस क्लब तकं नीस्वना पत्रकारिता ख्यःया विकासया नापं पत्रकारतय्त क्षमता अभिबृद्धि यायेगु व पत्रकारिता ख्यलय् मन क्वसायेकेगु ज्या यानादिल।
अग्रज पत्रकार कर्माचार्यया पत्रकारिता ख्यलय् विेशेष योगदानया कदर यासें नेपाःया राज्यस्तरं विशिष्ट योगदान याइपिंत बिइगु शुभराज्याभिषेक पदक, वीरेन्द्र ऐश्वर्य सेवा पदक नापं थीथी पदक व उपाधिं छाय्पिइ धुंकूगु दु। गुम्ह ब्यक्तित्वया पत्रकारिता ख्यलय् याःगु योगदान थौंया पुस्ताया निंति न्हयाबलें हपाः जुयाच्वनी।
नेपाःया पत्रकारतय्त न्हापांगु खुुसिइ नेपाल पत्रकार संघ नीस्वनाः पत्रकारतय्त संगठित यानादीम्ह तत्कालिन नेपाल पत्रकार संघ हालया नेपाल पत्रकार महासंघया संस्थापक नायः मदुम्ह सत्यनारायणबहादुर श्रेष्ठया ११० क्वःगु बुन्हि हना ज्याझ्वलय् “सत्यनारायण बहादुर श्रेष्ठ प्रेस स्वतन्त्रता सेना सम्मानं” छाय्पिइ दयाः जिपिं तसकं लय्ता ।
थुगु लसतां भयब्यूगु इलय् छिगु ताःआयु व भिं उसायया कामना यासे दुनुगलं निसें हनावना तसें मगल कामना यानाच्वना ।
