सञ्चार नापं सूचना प्रविधिमन्त्री जगदीश खरेलं जिम्मेवार व जवाफदेही पत्रकारिता यायेत सञ्चारकःमितय्त इनाप यानादीगु दु।

नेपाल पत्रकार महासङ्घ ख्वप जिल्ला शाखाया २९ क्वःगु स्थापना दिवसया झ्वलय् थौं थन ग्वसाः ग्वःगु ज्याझ्वःया उलेज्या यानादिसें सञ्चारमन्त्री खरेलं सत्यतथ्य स्वयां पिने वनाः गैरजिम्मेवार ढङ्गं थःथत्थें बुखँ संप्रेषण जुया वःगुलिं चिन्ता प्वंकादिल। वइगु फागुन २१ गते जुइगु निर्वाचनय् उम्मेदवारी बिइगु वा मबिइगु बारे थःम्हं छुं नं निर्णय मयानागु अवस्थाय् सम्प्रेषित बुखँया विषय आश्चर्य जुयादिसें वय्कलं विश्वसनीयता कायम यायेगुपाखे आमसञ्चारमाध्यम तय्गु ध्यान वनेमाःगु आवश्यक जू धयादिल।

सञ्चारमन्त्री निर्वाचनय् दनेत्यंगु धइगु सन्दर्भय् ध्वाथुइकादिसें वय्कलं धयादिल, “चुनावय् दनिगु धइगु खँत नं वल, फलानो पार्टीं दनेगु कि, थ्व पार्टीं दनी हँ, थ्व थासं दनी हँ, उगु थासं दनी हँ धइगु नं खँ वल, तर जित थ्व खँ ध्वाथुइके मास्तिवः कि जिं आःतक चुनावय् दनेगु वा मदनेगु धइगु छुं नं निर्णय यानागु मदु। थौं तक छुं नं पार्टीइ दुहाँवनागु मदु, पार्टीइ वनागु मदु, वार्ता व सहलह यानागु मदु, वये धयागु मदु, वने धयागु मदु, जिं छुं नं धयागु मदुनि।” प्रधानमन्त्री सुशीला कार्की नेतृत्वया सरकारया प्रवक्ताया तकं हैसियतं आमजनतातय् न्ह्यथनेबहःगु सहभागिताय् सफल जुइक चुनाव पूवंकेत चा न्हि मधाःसे जुयाच्वनागु अवस्थाय् थःम्हं निर्णय मयानागु विषय थथे बुखँ सम्प्रेषण जूगुलिं दुःख ताःगु वय्कलं धयादिल।

सञ्चारमन्त्री खरेलं सत्यतथ्यलिसें विश्वसनीय, सन्तुलन व निष्पक्षरुपं बुखँ सम्प्रेषण यायेत आमसञ्चारकःमितय्त इनाप यानादिल।मन्त्री खरेलं चुनाव लिक्क वयाच्वंगु अवस्थाय् मतदाता शिक्षायात प्रभावकारी दयेकेगु, निष्पक्ष, धाँधलीमुक्त व स्वतन्त्र ढङ्गं निर्वाचन पूवंकेगु, पाय्छिम्ह उम्मेदवार छनोट यानाः बदर मजुइ कथं मतदान यायेगु थेंजाःगु विषययात प्राथमिकता बियाः बुखँ सम्प्रेषण यायेत आमसञ्चारकःमितय्गु ध्यानाकर्षण यानादिल।वय्कलं धयादिल, “देय् छाय् विकास मजुल, सुनां यानाः विकास जुइमफुत, गुलि व्यवस्थाया ह्यूपाः वल, पञ्चायत वल, प्रजातन्त्र वल, लोकतन्त्र वल, गणतन्त्र वल, फुक्क व्यवस्था ह्यूपाः जुल, द्वलंद्वः मनूत शासन व्यवस्थाय् वल, सरकार न्ह्याकल, प्रधानमन्त्री–मन्त्री जुल, तर देय् छाय् विकास मजुल, जनताया अवस्था छाय् भिंके मफुत, छाय् जेनजी जनआन्दोलन जुल, दर्जनौं बलदानी बिइमाल धइगु बारे जिम्मेवार बुखँ माध्यमं बुखँ हयेमाः, तर अथे जुइफयाच्वंगु मदु।”वय्कलं धयादिल।

बागमती प्रदेशया संस्कृति नापं पर्यटनमन्त्री सुरेश श्रेष्ठं सत्यतथ्ययात उपेक्षा यानाः लोकप्रिय पत्रकारितां यानाः लिपांगु इलय् समस्या सिर्जना जूगु न्ह्यथनादिसें जिम्मेवार, जवाफदेही पत्रकारिता यायेत इनाप यानादिल।ज्याझ्वलय् ख्वपया प्रमुख जिल्ला अधिकारी उमेशकुमार ढकाल, नेपाल पत्रकार महासङ्घया केन्द्रीय न्वकू उम्मिद वागचन, मध्यपुरथिमि नगरपालिकाया प्रमुख सुरेन्द्र श्रेष्ठ, नेपाल पत्रकार महासङ्घ उपत्यका प्रदेश नायः टेनिश रेक्का, महासङ्घया येँया नायः शोभा अर्याल, यल नायः रामहरि कार्की, वरिष्ठ पत्रकार कबिर राणा, महासङ्घ ख्वप शाखाया नायः सुन्दर शिल्पकार व पूर्वनायः नारायणसुन्दर किलम्बु, सम्मानित पत्रकार पेशल आचार्यलिसेंया वक्तापिंसं पत्रकार हकहितया बारे धारणा प्वंकादिसें जिम्मेवार व जवाफदेही पत्रकारिताय् बः बियादिल।

उगु झ्वलय् पत्रकार पेशल आचार्ययात स्व भगवानदास–राजकुमार महर्जन स्मृति पत्रकारिता पुरस्कार, लीला श्रेष्ठयात क्रियासिल मिसा पत्रकारिता पुरस्कार व विनोद कोजुयात स्व मैयादेवी शिल्पकार स्मृति पत्रकारिता पुरस्कार लःल्हाःगु खः।

Categorized in राष्ट्रिय