लिच्छिवीकालिन इतिहास नाप स्वाःगू ताम्रकार समुदाय यागु अध्ययन अनुसन्धान बालाक्क जुइमाः धका नेपालभाषा एकेडेमिका चान्सलर नाप नेवाः न्ह्यलुवाः मल्ल के सुन्दर धयादीगु खः।

ताम्रकार समाजया न्ह्यय् क्वःगु मंकाः मुज्या नाप नीछक्वःगु साधारणसभाय् मुँपाहा कथं झायादीम्ह नेवाः न्ह्यलुवाः मल्ल के सुन्दरं लिच्छवी जुजु अंशुवर्माया कैलाशकूट दरवारय् सिजःया पौ लगायतया सामाग्री दयकिगूलि ताम्रकार समुदाय न याःगु धका शिलालेखय् उल्लेख दुगुलि थुकिइ बालाक्क मालेगु ज्या यायेमाःगुलि बः बियादीगु खः। वयकलं ताम्रकार समाजं थीथी पंगः दथुइ आःतक याःगु संघर्ष मेमेगु खलः पुचलं प्रेरणाया श्रोत कथं न्ह्याः वनेमाः धका धयादीगु खः।

गौरवमय इतिहास ज्वनातःगु ताम्रकार समुदाय न थःगु मौलिक विशिष्ट शीपयात न्ह्यने यकेगुलि न्हुगु पुस्ता न लबः कया न्ह्यावनेमाः धका धयादीगु खः। ताम्रकार समुदाय न उत्पादन याःगु मू वःगु सामाग्री उत्पादन प्रविधी, शैलीयात अन्तराष्ट्रीय स्तरय् तक नक्कल याये मफइगु कथं पेटेन्टको अधिकार कया न्ह्यावनेमाः धका धयादीगु खः।

ताम्रकार समाजया अध्यक्ष बिनोद ताम्रकारया सभाध्यक्षताय् जुगु उगु ज्याझ्वलय् नेपालभाषा मंकाः खलः, यलया अध्यक्ष महेन्द्र महर्जन, यल नेवाः समाजया अध्यक्ष नानीकाजी शाक्य न भिंतुना न्वचु तयादीगु खः।समाजया निवर्तमान अध्यक्ष रविन्द्रराज ताम्रकारया न ब्बति दुगु उगु ज्याझ्वलय् जेष्ठ नागरिक सम्मान व एसइइ निसे स्नातकोत्तर तह उतिर्ण ताःलापिन्त न हने जुगु खः।

Categorized in राष्ट्रिय