प्रधानमन्त्री सुशीला कार्कीलिसे नेपाल तामाङ घेदुङया प्रतिनिधिमण्डलं नापलाःगु दु। थौं सुथय् नापलायेगु झ्वलय् तामाङ समुदायया जनसङ्ख्या, संस्कृति, आर्थिक–सामाजिक अवस्थालिसेंया विषयय् खँल्हाबल्हा जूगु प्रधानमन्त्रीया प्रेस सल्लाहकार रामबहादुर रावलं धयादिल।

घेदुङं थ्वहे माघ ५ गते सोनाम ल्होछारया लसताय येँय् तामाङ सांस्कृतिक महोत्सव लिसें भिंतुना कालबिल ज्याझ्वः ग्वसाः ग्वयेत्यंगु धासें उगु ज्याझ्वलय् मूपाहाँ कथं ब्वति कयादीत प्रधानमन्त्री कार्कीयात इनाप याःगु धयादिल। घेदुङया पदाधिकारीपिंसं तामाङ समुदायया जनसङ्ख्या ३० लखसिबें अप्वः दुसां जनगणनाय् द्वनाः च्वंगुलिं १७ लख जःखः जक खनेदूगुलिइ प्रधानमन्त्रीया ध्यानाकर्षणनापं याकूगु खः।

उगु झ्वलय् प्रधानमन्त्री कार्कीं आःया अवस्थाया लोकतान्त्रिक निकासया निंतिं निर्वाचन छगू जक विकल्प जूगुलिं समाजया फुक्क तगिं व तप्कापाखें ग्वाहालिया अपेक्षा यानागु धयादिल। “देय् चुनावय् क्वब्वाये धुंकूगु दु । थ्व चुनाव सामान्य अवस्थाया मखुसें देय्यात निकास बिइगु व दिगो स्थिरतापाखे यंकीगु चुनाव खः”, वय्कलं धयादिल, “भदौ २३ व २४ गतेयात दिमागय् तये।

आः हाकनं थुजाःगु घटना जुइमज्यु। युवाया आकांक्षा कथं झी न्ह्यायेमाः । छिकपिंसं नं आः वइगु चुनावय् न्हूपिं, युवा व इमानदार सांसद त्याकाः संसदय् छ्वयादिसं।”प्रधानमन्त्री कार्कीं पुलांगु मानसिकता, सोच व शैलीं आः देय् न्ह्याके मफइगु जुयाः युवाया भावना कथं शासन सञ्चालन यायेत युवा व इमानदार मनू नेतृत्वय् वयेमाःगुलिइ बः बियादीगु प्रेस सल्लाहकार रावलं धयादिल। प्रधानमन्त्री कार्कीं चुनावय् म्वाः मदूगु चलखेल व गतिविधि जुइके मबीत आः समुदाय स्तरपाखें हे सकलें सतर्क जुइमाःगु बिचाः तयादिल।

“भ्रष्टाचार अन्त्य यायेगु खःसा उकिया विरुद्ध चुनावपाखें हे पहल जुइमाः। मतदाता नं सतर्क जुइमाः। आः न्हापा न्हापाया चुनावय् थें मखूगु अभ्यास व प्रवृत्तियात चिइका छ्वयेमाः”, प्रधानमन्त्रीया धापू दु।

Categorized in राष्ट्रिय